Aarde skud by Anker
Verouderde toerusting en te min data verhinder wetenskaplikes om die skielike toename in aardbewings in die Kunenestreek behoorlik te ontleed.
Ronelle Rademeyer
Namibië se geofisikusse krap kop oor die toename in seismiese aktiwiteit in die omgewing van Anker, 'n nedersetting tussen Kamanjab en Khorixas, waar 'n aardbewing en ligter skuddings die afgelope week opnuut voorgekom het.
Die land se verouderde seismologiese toerusting, kapasiteitsprobleme en gebrekkige data maak dit egter vir wetenskaplikes moeilik om hierdie verskynsel na behore te ontleed.
Dr. Norton Titus, geofisikus verbonde aan die Geologiese Opname van Namibië, het by navraag bevestig 'n aardbewing wat 4,6 op die Richterskaal gemeet het, het Donderdagoggend kort ná negeuur voorgekom.
Dit is deur drie seismiese stasies in die land geregistreer.
Op 14 Maart het 'n aardbewing wat 4,0 geregistreer het, ook in die gebied voorgekom.
“Dit is 'n baie interessante situasie vir ons. Ons weet daardie gebied is seismies meer aktief, maar die omvang was nog altyd klein.”
Die gebied is in die Kaoko- orogeniese gordel geleë. Hoewel Namibië lae seismiese aktiwiteit het en die intensiteit ook nooit hoog is nie, is dié gordel een van die meer aktiewe seismiese gebiede in die land, sê Titus.
“Skielik word baie meer berigte van skuddings in daardie gebied ontvang. Dit is 'n groot raaisel vir ons.”
Hy sê die laaste week was die skuddings boonop “redelik kort op mekaar”.
'n Verslag is vroeër vanjaar deur die China Global TV Network (CGTN) op sy Facebook-blad geplaas waarin voorspel word 'n groot aardbewing kan Namibië in 2019 tref.
Titus sê hoewel hy bewus is van die verslag, is te min data beskikbaar om so 'n voorspelling te maak.
“As ons nie data het nie, kan ons net spekuleer. En dit is nie hoe wetenskaplikes te werk gaan nie.
“Dit is soos om met verouderde CCTV-toerusting te kyk hoe 'n rooftog gepleeg is. 'n Mens wil die nommerplaat van die skurke se voertuig sien, maar die beeldmateriaal is te swak daarvoor,” verduidelik hy die situasie waarmee die span by Geologiese Opname te kampe het.
“Ons sewe seismiese stasies dek net 7% van die land se oppervlak. Boonop is die toerusting omtrent 20 jaar oud.”
Titus sê hy staan aan die hoof van 'n projek vir die oprigting van 'n seismiese waarnemingsentrum in die land wat behels dat 'n hele aantal nuwe stasies toegerus gaan word om uiteindelik 33% van die land seismies te kan monitor.
Die eerste van 'n besending nuwe seismometers het reeds in die land aangekom en nóg word binnekort verwag.
Die verhoogde voorkoms van skuddings bekommer inwoners van die gebied, en mnr. Marius Sheya, goewerneur van die Kunenestreek, het Anker vroeër besoek om vas te stel hoe groot die skade was wat deur die aardbewing op 14 Maart aangerig is.
Hy het die Laerskool Edward //Garoëb besoek waar meer as 300 leerlinge skoolgaan, asook van die huise wat beskadig is.
Die goewerneur is meegedeel dit sal veiliger wees om die skool te verskuif.
Namibië se geofisikusse krap kop oor die toename in seismiese aktiwiteit in die omgewing van Anker, 'n nedersetting tussen Kamanjab en Khorixas, waar 'n aardbewing en ligter skuddings die afgelope week opnuut voorgekom het.
Die land se verouderde seismologiese toerusting, kapasiteitsprobleme en gebrekkige data maak dit egter vir wetenskaplikes moeilik om hierdie verskynsel na behore te ontleed.
Dr. Norton Titus, geofisikus verbonde aan die Geologiese Opname van Namibië, het by navraag bevestig 'n aardbewing wat 4,6 op die Richterskaal gemeet het, het Donderdagoggend kort ná negeuur voorgekom.
Dit is deur drie seismiese stasies in die land geregistreer.
Op 14 Maart het 'n aardbewing wat 4,0 geregistreer het, ook in die gebied voorgekom.
“Dit is 'n baie interessante situasie vir ons. Ons weet daardie gebied is seismies meer aktief, maar die omvang was nog altyd klein.”
Die gebied is in die Kaoko- orogeniese gordel geleë. Hoewel Namibië lae seismiese aktiwiteit het en die intensiteit ook nooit hoog is nie, is dié gordel een van die meer aktiewe seismiese gebiede in die land, sê Titus.
“Skielik word baie meer berigte van skuddings in daardie gebied ontvang. Dit is 'n groot raaisel vir ons.”
Hy sê die laaste week was die skuddings boonop “redelik kort op mekaar”.
'n Verslag is vroeër vanjaar deur die China Global TV Network (CGTN) op sy Facebook-blad geplaas waarin voorspel word 'n groot aardbewing kan Namibië in 2019 tref.
Titus sê hoewel hy bewus is van die verslag, is te min data beskikbaar om so 'n voorspelling te maak.
“As ons nie data het nie, kan ons net spekuleer. En dit is nie hoe wetenskaplikes te werk gaan nie.
“Dit is soos om met verouderde CCTV-toerusting te kyk hoe 'n rooftog gepleeg is. 'n Mens wil die nommerplaat van die skurke se voertuig sien, maar die beeldmateriaal is te swak daarvoor,” verduidelik hy die situasie waarmee die span by Geologiese Opname te kampe het.
“Ons sewe seismiese stasies dek net 7% van die land se oppervlak. Boonop is die toerusting omtrent 20 jaar oud.”
Titus sê hy staan aan die hoof van 'n projek vir die oprigting van 'n seismiese waarnemingsentrum in die land wat behels dat 'n hele aantal nuwe stasies toegerus gaan word om uiteindelik 33% van die land seismies te kan monitor.
Die eerste van 'n besending nuwe seismometers het reeds in die land aangekom en nóg word binnekort verwag.
Die verhoogde voorkoms van skuddings bekommer inwoners van die gebied, en mnr. Marius Sheya, goewerneur van die Kunenestreek, het Anker vroeër besoek om vas te stel hoe groot die skade was wat deur die aardbewing op 14 Maart aangerig is.
Hy het die Laerskool Edward //Garoëb besoek waar meer as 300 leerlinge skoolgaan, asook van die huise wat beskadig is.
Die goewerneur is meegedeel dit sal veiliger wees om die skool te verskuif.
Kommentaar
Republikein
Geen kommentaar is op hierdie artikel gelaat nie