Aanvalle op toeriste skaad land se aansien

Francoise Steynberg - Die herdenking van Wêreldtoerismedag kom op 'n tydstip wanneer die toerismebedryf in Namibië die hoë risiko dra om weens die gewelddadige aanvalle op sy reisigers sy aansien te verloor. Só het die adjunkminister van die omgewing en toerisme, Tommy Nambahu, Woensdag tydens die vieringe van Wêreldtoerismedag met die tema “Toerisme begin tuis” gesê. “Verskeie ambassades waarsku hul burgers wat Namibië wil besoek, om dit te heroorweeg. Sulke negatiewe aktiwiteite skaad die beeld van die land en het 'n negatiewe impak op die toerismebedryf,” het Nambahu gesê.Hy sê die koste-implikasies om nie na toeriste om te sien nie, sal toerismegroei belemmer wat sal lei tot werksverliese en verliese aan inkomste en werkverskaffing. “Veiligheid en sekuriteit vir toeriste bly belangrik in die toerismebedryf. Niks kan toerisme tot 'n skielike dramatiese stilstand ruk as ons toeriste veilig voel nie.”Nambahu sê dit is om hierdie rede dat veiligheid en sekuriteit hoog op die agenda van verskeie owerhede in die regering bly. “Namibië moet as 'n aanloklike toeristebestemming met mededingende voordele geposisioneer word. Ek pleit by julle om na ons besoekers om te sien en hulle as jul persoonlike gaste te bederf. Dit is die ware betekenis van 'toerisme begin tuis',” sê die adjunkminister.“Ons moet besoekers aan ons land welkom laat voel soos ons hulle in ons huise sal laat welkom voel. Toerisme is almal se besigheid.” Met die wêreldwye mededinging vir toeriste, “is dit noodsaaklik dat Namibië sy produkte en dienste verbeter, sodat ons ons mededingende voordeel kan handhaaf”. Nambahu het gemaan dat Namibië sy biodiversiteit moet beskerm, veral teen die sinnelose stroping van natuurlike hulpbronne soos onder meer renosters, olifante, ietermagô's en bome. “Terwyl daar 'n effense toename in buitelandse aankomste van 2015 na 2016 is, moet ons Namibiërs die meeste van die ekonomiese bydrae maak, maar ons moet volhoubaarheid in gedagte hou. Ons is trots om ons natuurlike hulpbronne en kulturele diversiteit met die res van die wêreld te deel, maar ons land is ekologies broos.”Die adjunkminister het ook met die tema van Wêreldtoerismedag Namibiërs - as 'n belangrike deel van die toerismemark - aangemoedig om die land te ontdek. “'Toerisme begin tuis' dui ook op ons trots in wat ons nasie kan bied rakende kultuur, erfenis en unieke ervaringe van ons natuurskoon. Dit is 'n moet dat Namibiërs ook Namibië ontdek.”Nambahu meen dit is ook noodsaaklik vir nasiebou en harmonie. Namibië is 'n lidland van die Verenigde Nasies se Wêreldtoerismeorganisasie (UNWTO) wat jaarliks saam met ander lande op 27 September Wêreldtoerismedag vier. UNWTO se tema vir vanjaar is “Volhoubare Toerisme - 'n Instrument vir ontwikkeling”.

Aanvalle op toeriste skaad land se aansien

Kommentaar

Republikein 2025-11-05

Meld asseblief aan om kommentaar te lewer

Aanvalle op toeriste skaad land se aansien

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.