Aanlyn wetsontwerp ongrondwetlik – IPPR

Denver Kisting - Volgens mnr. Frederico Links, ‘n navorser verbonde aan die instuut vir openbare beleidsnavorsing (IPPR), is Namibië se wetsontwerp wat met elektroniese transaksies en aanlyn misdaad verband hou ongrondwetlik.Tydens ‘n voordrag gisteroggend in die hoofstad het Links skerp te velde getrek teen wat hy noem ‘n verontagsaming van die grondwetlike regte van vryheid van spraak en meningsuiting, dié van assosiasie en reg op privaatheid.Sou die voorgestelde wetgewing uiteindelik bekragtig word, kan dit lukraak ingespan word om talle menseregtevergrype te pleeg én te regverdig, waarsku Links.Links sê voorts die IPPR is diep gegrief deur die gebrek aan openbare beraadslaging wat slegs uit twee een dag lange werksessies, in Augustus en September verlede jaar, bestaan het. Hulle is veral ongelukkig daaroor dat dié beweerde konsultasies soos prosedurele oëverblindery voorgekom het en dat daar duidelik gesinspeel is daarop dat geen beduidende verskille aan die wetsontwerp aangebring sal word nie.Daar word gevrees dat die wetsontwerp eersdaags deur die parlement gestoomroller sal word.Amptelike statistiek oor die impak van aanlyn misdaad in Namibië bestaan nie, sê Links. Dit maak dit moeilik om te bepaal wat die omvang van die tipe oortreding is. ‘n Rekenaarwetenskapprofessor verbonde aan die Namibië Universiteit van Wetenskap en Tegnologie (Nust), prof. Hussin Jazie, sê sy inligting dui daarop dat nagenoeg 70% van Namibiërs in sy steekproef in die laaste drie maande ten prooi daarvan geval het.Jazri was ‘n lid van die gehoor tydens gister se bekendstelling.Prof. André du Pisani, wat ook die sessie bygewoon en tans gemoeid is daarmee om teenterreur- en geldwasserybeleid te hersien, sê die grootste uitdaging wat beleidshersiening betref, is die dinamiese aard van tegnologie. Met ander woorde, sê Du Pisani, teen die tyd wat die hersiende beleid uiteindelik van krag word, is dit té oud en nie meer van toepassing nie.Tydens ‘n nuuskonferensie laat gistermiddag het mnr. Tjekero Tweya, die minister van inligting en kommunikasietegnologie, gesê hy het ‘n jaar gelede, toe nuus oor gebrekkige beraadslaging rugbaar geword het, die mosie onttrek waarná landswye konsultasies glo plaasgevind het. “Sou dit ongrondwetlik wees, is die prokureur-generaal daar (om die regering van regsraad te bedien). Die idee is nie om ongrondwetlike wette te hê nie.”Tweya het ook teen die IPPR uitgevaar en die navorsingsinstelling daarvan beskuldig dat hulle verslag oor toegang tot inligting misleidend en kwaadwillig is.Hy sê sedert die bekendmaking van die verslag het hy self op ‘n sending gegaan om alle bewerings te ondersoek wat daarin vervat is.Die IPPR, sê Tweya, kon geen naam van enige beampte van enige ministerie of regeringsinstelling wat hulle glo gekontak het, verstrek nie. Die meeste woordvoerders van dié liggame het ontken dat die IPPR met hulle in verbinding was, sê hy. “Dit kon ‘n skoonmaker gewees het wat hulle daar gekry het. Of iemand wat tee maak. Dit kon enigiemand gewees het.”Hieroor sê Links by navraag hulle hou voet by stuk dat die inhoud van hul inligting feitelik akkuraat is. Terselfdertyd spreek die IPPR by monde van Links sy misnoë daarmee uit dat die minister die IPPR se agenda as ‘kwaadwillig’ beskryf het.

Aanlyn wetsontwerp ongrondwetlik – IPPR

Kommentaar

Republikein 2025-05-08

Meld asseblief aan om kommentaar te lewer

Aanlyn wetsontwerp ongrondwetlik – IPPR

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie