83 nuwe gevalle, een sterfte

Uit 1 075 weefselmonsters wat vir Covid-19 getoets is, het 83 positief vir die siekte getoets. Volgens die minister van gesondheid en maatskaplike dienste, dr. Kalumbi Shangula, is 64 mans en 19 vroue. Die jongste is drie maande oud en die oudste 75 jaar oud. Uit die 83 nuwe gevalle is 32 in Oshakati, 22 in Mariental, 16 in Windhoek, drie in Swakopmund, twee elk in onderskeidelik Walvisbaai en Okahandja en een elk in onderskeidelik Otjiwarongo, Karasburg, Engela, Katima Mulilo, Gobabis en Outapi aangeteken.

Volgens Shangula het nog 180 mense herstel wat die totaal op 8 749 te staan bring. Dit sluit 97 in Oshana, 74 in Khomas, sewe in Erongo en twee in Ohangwena in.

Uit die 2 049 aktiewe gevalle is 15 baie ernstig of kritiek. Dit sluit een baie ernstige en drie kritieke gevalle in Erongo en twee baie ernstige en nege kritieke gevalle in Khomas in.

Shangula het nog 'n Covid-19-verwante sterfte aangekondig en wel die van 'n 49-jarige man van die Gobabis-distrik. Dit bring die totaal Covid-19-verwante sterftes op 120 te staan.

Tans word 9 381 kontakte gemonitor, tot op hede is 94 974 weefselmonsters getoets en 1 126 mense is in kwarantyngeriewe oraloor in die land.