55 jaar van Élysée-verdrag herdenk

Maandag 22 Januarie was dit presies 55 jaar sedert die Élysée-verdrag tussen Frankryk en Duitsland onderteken is. Dié ooreenkoms, wat op 22 Januarie 1963 in werking getree het, het bilaterale samewerking tussen Duitsland en Frankryk ná die Tweede Wêreldoorlog op ‘n nuwe trajek geplaas. ‘n Stewige netwerk van veelvuldige betrekkinge het op verskeie vlakke, insluitende politiek, sake en gemeenskap, ontwikkel. Volgens ‘n verklaring deur die Duitse ambassade in Windhoek was dit die begin van ongekende ontwikkeling in Frans-Duitse vriendskapsbande.Om die gebeurtenis te herdenk, werk die Franko-Namibiese Kultuursentrum (FNCC) en die Goethe-Institut van Namibië saam. Leerlinge van staatskole in Windhoek word betrek om begrip vir versoening in Namibiese verband te bevorder. ‘n Projek om kortfilms te vervaardig word deur die Duits-Franse kultuurfonds gefinansier.“Vanjaar se projek van kortfilms neem die proses van Franse en Duitse versoening as voorbeeld. Met die bystand van verskeie vennote sal leerlinge wat Frans en Duits op skool het, leer van die belangrike proses wat kultuur in die versoening van twee sleutellede van die Europese Unie gespeel het.“Benewens die filmprojek wil ons Namibiese leerlinge betrokke laat raak by die proses van versoening deur kulturele samewerking,” het die direkteur van die Goethe-Institut, mnr. Daniel Stoevesandt, gesê.Die direkteur van die FNCC, mnr. Jérôre Kohl, het op sy beurt gesê die sentrum het waardering vir kulturele uitruiling wat brûe tussen gemeenskappe bou en is opgewonde om deel van die projek te wees. “Ons waardeer die volhoubaarheid van hierdie projek wat deur die betrokkenheid van plaaslike vennote verseker word,” het hy gesê.Altesaam 50 gekose leerlinge, wat Duits en Frans as vakke het, sal ‘n reeks werkwinkels bywoon waar verskillende aspekte van die filmmaakproses, van die skryf van ‘n draaiboek, verfilming en redigering tot bemarking gedek sal word.Plaaslike vennote van die projek is Joe-Vision Production, die Namibiese Filmkommissie, die Nasionale Raad van die Kunste, die College of the Arts en andere.“Die projek sal begin met ‘n inleiding tot Frankryk en Duitsland se benadering tot versoening ná die Tweede Wêreldoorlog om die Europese konteks te verstaan. Hierna sal ons Namibiese versoening ondersoek deur middel van die leerlinge se eie stories wat uiteindelik hul filmprojekte sal word. Ons hoop om die leerlinge se vaardighede en selfvertroue te versterk,” het Stoevesandt gesê.Tydens die werkwinkels sal die leerlinge leer hoe om hul slimfone te gebruik en om sagteware wat geredelik beskikbaar is aan te wend sodat die projek volhoubaar kan wees.In 1963 het die Élysée-verdrag op betrekkinge op die gebied van verdediging, onderwys en die jeug gefokus. Dit word allerweë beskou as die enjin wat Europese integrasie aangedryf het. Europese Erfenisjaar 2018 is daarop gemik om bewustheid van groot maatskaplike en politieke gebeure te bevorder en om die besef van ‘n Europese identiteit te versterk. Vanjaar se tema is “Kultuurerfenis, Jeug en Skeppendheid”.

55 jaar van Élysée-verdrag herdenk

Kommentaar

Republikein 2025-06-17

Meld asseblief aan om kommentaar te lewer

55 jaar van Élysée-verdrag herdenk

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie