396 nuwe gevalle, twee sterftes

Twee nuwe Covid-19-verwante sterftes, die van 'n 71-jarige en 'n 25-jarige vrou van onderskeidelik Gobabis en Windhoek, het Namibië se syfer tot 171 opgeskuif. Vandag is 396 nuwe gevalle aangeteken en het die land nou 2 414 aktiewe gevalle. Hiervan is 153 in die hospitaal en 27 in intensiewesorgeenhede (ICU). In Khomas is 80 gevalle in die hospitaal en 25 in ICU, in Erongo 27 gevalle in die hospitaal en twee in die ICU, in Omusati tien in die hospitaal, in Hardap en Oshana agt onderskeidelik in die hospitaal, in Ohangwena sewe, in Oshikoto ses, in Kunene vyf en in onderskeidelik Kavango-Oos en Zambezi een elk.

Nog 223 mense het herstel, 212 in Khomas en 11 in Erongo, wat die totaal op 15 489 te staan bring. Tot op hede is 186 883 weefselmonsters getoets, 4 763 kontakte word opgevolg en 1 042 mense is in kwarantyn.