324 hoogste getal bevestigde gevalle binne 24 uur sedert uitbreek van Covid-19-pandemie

Die 324 nuwe Covid-19-gevalle wat vandag aangekondig is, is die hoogste getal bevestigde gevalle wat binne 24 uur aangemeld is sedert die aanvang van die pandemie in Namibië in Maart vanjaar. Uit die 324 gevalle is 223 in Windhoek, 69% van die totale gevalle. Dit sluit 13 leerlinge, sewe onderwysers en nege studente in. Gevalle in Erongo en Otjozondjupa sy gevalle het byna verdubbel teen die van gister. Negentien gevalle is in die mynbedryf, 11 in die visbedryf en vier is gesondheidswerkers.

Nog twee Covid-19-verwante sterftes is ook aangeteken en wel die van 'n 38-jarige van Karasburg en 'n 79-jarige vrou van Khorixas. Dit stoot die sterftesyfer op tot 160.

Uit die nuwe gevalle is 223 in Windhoek, 23 in Swakopmund, 19 in Walvisbaai, sewe in Omaruru, vier in Usakos, 26 in Otjiwarongo, vier in Okahandja, een in Okakarara, ses in Oshakati, twee in Onandjokwe, een in Tsumeb, drie in Andara, twee in Eenhana en een elk in onderskeidelik Keetmanshoop, Outjo en Mariental aangeteken.

Nog 114 mense het herstel wat die totaal op 14 332. Hiervan was 84 in Khomas, 15 in Erongo, 14 in //Kharas en een in Omusati.

Die aktiewe gevalle staan tans op 1 602 waarvan 15 baie ernstig of kritiek is. Elf gevalle in Khomas is baie ernstig en drie in 'n kritieke toestand, terwyl Erongo een kritieke geval het.

Tot op hede is 172 955 weefselmonsters getoets, 3 416 kontakte word gemonitor en 733 mense is in kwarantyn.