300 toeriste in 19 dae

Francoise Steynberg



Tydens die toetsfase van die toe­rismeherlewingsinisiatief het 300 toeriste tussen 11 en 30 September op die Internasionale Lughawe Hosea Kutako (HKIA) geland.

Só het die minister van die omgewing, bosbou en toerisme, mnr. Pohamba Shifeta, Vrydag tydens 'n media­konferensie in die hoofstad gesê.

Die 300 toeriste in 19 dae is 'n druppel in die emmer teen die 379 964 ­toeriste wat Namibië in Julie tot September 2019 volgens die toeristestatistiek­verslag van 2019 besoek het. Die ­piekseisoen in 2019 was vanaf Oktober tot Desember met 431 465 toeriste en April tot Junie met 400 864.

Volgens 'n verslag van die Gasvryheidsvereniging van Namibië (HAN) het verblyfbesettingsyfers ook van 64% in September 2019 tot onder 8% in September vanjaar getuimel.

“Ons moes eers die pandemie takel, maar die ekonomie moet herleef, anders gaan mense van honger doodgaan,” het Shifeta gesê.

“Verliese is reusagtig en werksverliese is 'n hopelose situasie. Ons is totaal en al tot stilstand gedwing met geen inkomste en bankrotskap in die toerismesektor,” het die minister gesê.

Shifeta is tog hoopvol dat die nuwe verslapte Covid-19-maatreëls, wat op 21 Oktober aangekondig is, die toerisme­sektor sal laat herleef.

“Die heropening van die grense en die opheffing van beperkinge op ­passasiersgetalle in openbare vervoer, private voertuie en toeroperateurs sal help,” het Shifeta gesê.

Hy sê positiewe terugvoering is reeds vanaf groot toeroperateurs in ­Duitsland ontvang om hul reise na Namibië voort te sit.

Tog, sê Shifeta, “die realiteit van die toekoms is onbekend en ­toerisme is 'n handelskommoditeit op die internasio­nale mark wat hewig beïnvloed word deur wat wêreldwyd gebeur”. Hy verwys na hernude stygings in Covid-19-gevalle in Amerika en Europa wat reise van toeriste van dié lande kan raak.

“Die volume van toeriste sal verder afhang van hul inkomste, want almal is ekonomies deur die pandemie geraak,” sê Shifeta.

“Die herlewingsinisatief duur voort en die toerismebedryf moet nou meer as ooit tevore met nuwe en meer innoverende idees tydens die nuwe normaal vorendag kom,” sê die minister.

“Die toerismebedryf moet nou hul mededingende produkte en pryse tydens die komende vakansieseisoen aanbied.”

Shifeta sê die pandemie gaan nie net verdwyn nie en “ons moet leer om daarmee saam te leef”, daarom die opening van hotelle, restaurante, klubs, casino's en openbare ­­

vervoer.

– [email protected]



REGULASIES

• Alle reisigers moet 'n negatiewe Covid-19- toets nie ouer as 72 uur nie met aankoms verskaf;

• Alle toeriste wat 'n ­negatiewe Covid-19-toets nie ouer as 72 uur van 'n ­geakkrediteerde ­laboratorium in die land van hul vertrek verskaf, mag na hul ­bespreekte bestemming reis met hul vakansie­plan in die land;

• Die vereiste vir 'n verpligte ­Covid-19-toets op die vyfde dag is gekanselleer;

• Alle reisigers met 'n ­negatiewe Covid-19-toets ouer as 72 uur, maar nie ouer as sewe dae nie, sal die land mag binnekom, maar is onderhewig aan kwarantyn vir sewe dae onder toesig by 'n toerismefasiliteit waar hulle bespreek het;

• Toeriste sonder 'n negatiewe Covid-19-toets sal nie in Namibië toegelaat word nie;

• Covid-19-toetse moet in Engels wees;

• Reisigers moet met aankoms 'n gesondheidsverklaring voltooi en besonderhede van hul reisplan aan gesondheidsbeamptes by grense verskaf;

• Reisigers se temperatuur sal met aankoms en vertrek by grense deur gesondheidsbeamptes gemeet word;

• Alle reisigers wat simptome toon, sal verder ondersoek word en in kwarantyn bly totdat 'n herhaalde Covid-19-toets op eie koste gedoen word;

• As die resultaat positief is, sal die toeris na 'n isolasiefasiliteit van die gesondheidsministerie geneem en op eie koste behandel word;

• Toeriste moet oor reisversekering beskik wat mediese sorg dek of in geval van onverwagte uitgebreide verblyf in Namibië;

• Alle reisigers moet te alle tye maskers by grensposte en in die publiek dra;

• Daar moet aan lugrederye se vereistes voldoen word om ­toegelaat te word om aan boord te gaan;

• Toeriste word toegelaat om slegs toerismefasiliteite wat by die Namibië Toerismeraad (NTB) geregistreer is, te gebruik. Volg die lys by www.namibiatourism.com.na;

• Toegang tot Namibië word slegs via die Internasionale Lughawe Hosea Kutako en Walvisbaai-lughawe en landsgrensposte van Ariamsvlei, Noordoewer en Katima Mulilo toegelaat, asook enige ander wat mettertyd mag aangekondig word;

• Toeriste moet aan alle visum­regulasies van hul lande voldoen;

• Reisigers sal ook aan ander formele immigrasieprosesse ­onderhewig wees;

• Ander reisigers as ­toeriste is ­onderhewig aan die Covid-19-­gesondheidsregulasies soos volgens die Staatskoerant Nr. 233, 235 en 256.

Vir verdere navrae, besoek die webtuiste van NTB by www.­namibiatourism.com.na.