25 leerlinge, toeris toets positief vir Covid-19

Nog 25 leerlinge van die senior sekondêre skool Oshakati het positief vir Covid-19 getoets. Die leerlinge, sowel as 'n toeris uit Suid-Afrika wat die land met negatiewe toetsuitslag binnegekom en later positief getoets het, is deel van die 41 nuwe gevalle wat vanaand bekendgemaak is. Uit die 41 nuwe gevalle is 32 mans en nege vroue. Die jongste is 13 jaar oud en die oudste 75 jaar oud. Uit die 41 nuwe gevalle is 27 in Oshakati, 13 in Windhoek en een in Karasburg aangemeld.

Nog 102 mense het herstel wat die totaal op 10 528 te staan bring. Dit sluit 56 gevalle in Oshana, 33 in Khomas, nege in Erongo, drie in Ohangwena en een in Omaheke in. Die aktiewe gevalle staan op 1 707 waarvaan drie in 'n baie ernstige of kritieke toestand is. Dit sluit een kritieke geval in Erongo en een baie ernstige en een kritieke geval in Khomas in.

Nog 'n Covid-19-verwante sterfte, dié van 'n 49-jarige man van Windhoek met veelvuldige onderliggende mediese toestande, bring die sterftesyfer nou op 132 te staan.

Tans word 7 501 kontakte gemonitor, tot op hede is 117 759 weefselmonsters getoets en 1 073 mense is nou in kwarantyngeriewe oraloor in die land.