20 jaar gelede, 3 Mei 2018

Maandag 27 April 1998

• Terwyl kommer oor die rol van tradisionele leiers in die desentralisasieproses uit verskeie oorde uitgespreek is, is die Minister van Streeks- en Plaaslike Regering en Behuising, dr. Nickey Iyambo, optimisties oor die toekoms van dié leiers.

• Verbruikers gaan van 1 Mei af les opsê as die verhoogde verkoopbelasting en bykomende verkoopheffings in werking tree.

• 'n Nuwe wending rondom die hantering van die omstrede grondkwessie het die afgelope week na vore gekom.

• Dit blyk nou die nasionale ­lugredery, Air Namibia, het die Minister van Werke, Vervoer en Kommunikasie, mnr. Hampie Plichta, ignoreer nadat hy onlangs gekla het dat sy kollegas in die Kabinet ook nie ag slaan op sy voorstelle oor onder meer die ­verhoogde huur van staatshuise nie.



Dinsdag 28 April 1998

• Namibiese vliegtuie is gevra om op die uitkyk te wees vir 'n vermiste Antonov-vragvliegtuig wat teen die einde van verlede jaar op 'n vlug van Abidjan in die Ivoorkus na Rundu soek geraak het.

• Afgevaardigdes van die ses lande in Afrika suid van die Sahara waar die Amerikaanse president, mnr. Bill Clinton, onlangs besoek afgelê het, sê die besoek lei 'n nuwe era in verhoudinge tussen Amerika en Afrika in.

• 'n Nuwe gebouekompleks van meer as N$34 miljoen wat uit woonstelle, ontspanningsgeriewe en winkelsentrums bestaan, word vir Lüderitz beoog.



Woensdag 29 April 1998

• Namibië is een van die hoogs aangeskrewe lande wat mededingendheid op die vasteland betref.

• Die dralende verhoor waarby die Nasionale Behuisingsonderneming betrokke is, het gister na 'n verdaging van meer as drie weke in die Hoërhof op 'n onverwagte slegte noot vir waarskynlik die twee mees prominente beskuldigdes in die saak hervat.

• 'n Ooreenkoms in beginsel om die uitlewering van voortvlugtiges en oortreders te bespoeding en beter samewerking in die uitruiling van inligting te verseker, was van die sake wat gister op die konferensie van ministers van justisie van die Suider-Afrikaanse Ontwikkelingsgemeenskap (SADC) bespreek is.



Donderdag 30 April 1998

• Slepende verskille en ­wedersydse beskuldigings van 'n kommunikasiegaping het nou breekpunt bereik met 'n Air Namibia-beskuldiging van 'n Dierks-vertrouensbreuk.

• Die Eerste Minister, mnr. Hage Geingob, moes die week vir die soveelste keer in die Nasionale Vergadering inspring om die regerende party vernedering te spaar.

• 'n Nasionale Droogtebeleid en –strategie is vandeesweek deur die Kabinet aanvaar.

• Swak arbeidverhoudinge in ­Namibië kan verder versleg en selfs onhanteerbaar word, indien die Ministerie van Arbeid nie finansiële ondersteuning kry nie.



Vrydag 1 Mei 1998

Openbare vakansiedag