20 jaar gelede

Maandag 8 Mei 2000

· Regstappe word teen minstens drie boere in die Omahekestreek oorweeg wat na bewering groeistimulante gebruik om hul beeste vet te voer met die oog op uitvoer na Europese market.

· Namibië en sy Suider-Afrikaanse bure gaan ’n magdom wrang vrugte pluk weens die politieke oproer in Zimbabwe.

· Die eerste handelskou- en beleggingsforum vir sakevroue in lidlande van die Suider-Afrikaanse Ontwikkelingsgemeenskap (SADC) het gister ten einde geloop nadat pres. Sam Nujoma die verrigtinge Vrydag amptelik geopen het.

· Nog ’n stap om vrede in die Demokratiese Republiek van Kongo (DRK) te bewerkstellig, word aanstaande maand geneem wanneer die Veiligheidsraad van die VVO al die strydende groepe in New York ontmoet.

Dinsdag 9 Mei 2000

· Die krisis in Zimbabwe kan daartoe lei dat beleggersvertroue in die hele Suider-Afrika in duie stort.

· ’n Haelbui, gepaard met sowat tien millimetre reën, was gister die voorspel tot ’n natterige Meimaand vir dele van Namibië.

· Hoewel nuus oor gunstige vooruitskattings vir graanoeste, verbeterde weiding en vetveekuddes steeds die botoon voer aan die landboufront, is die skadukant daarvan gerugte van allerlei veesiektes vanweë meer broeiplek vir insekte weens die bogemiddelde reënval.

· Die Namibiese sokkerspan is op volle sterkte vir sy kragmeting teen Zimbabwe in die kwarteindronde van die gesogte Cosafa Castle Bekerreeks die naweek in Bulawayo.

Woensdag 10 Mei 2000

· Spoke van ’n rampseisoen vir pelsers – die steunpilaar van Walvisbaai se visbedryf – het gister op dié hawedorp begin dwaal in afwagting op die kwotatoekenning van die nuwe seisoen.

· Die Namibiese regsowerhede is steeds vasbeslote om alle moontlike inligting te bekom oor die moorde op Swapo-aangehoudenes waarby die nou reeds berugte Suid-Afrikaanse “gifdokter”, Wouter Basson, glo betrokke was.

· Die staatskas se afhanklikheid van die Namibiese diamandbedryf is gister herbeklemtoon deurdat Namdeb belasting en mynregte van N$533 miljoen vir die boekjaar 1999 in die fiskus gestort het.

· Toestande by die Katutura-staatshospitaal is in die Nasionale Vergadering (NV) in oënskou geneem.



Donderdag 11 Mei 2000

· Die voorgestelde pensioenfonds vir alle Namibiërs is onrealisties en sal nie onder huidige geprojekteerde demografiese en fiskale toestande werk nie.

· Die botsende mening tussen die Herero-volk en die Namibiese regering oor grondbesit en herverdeling het gister in die ope gekom.

· Walvisbaai steier weer onder waterbeperkings nadat kragonderbrekings in die onttrekkingsgebied in die Kuiseb-delta en gebarste pypleidings die onder-normale toevoer tot die dorp verder belemmer het.

· Die toestand van hospitaal- en kliniekgeriewe en dienslewering by sommige van hierdie instellings is in die Nasionale Vergadering (NV) skerp deur Swapo en opposisieleiers gekritiseer.

Vrydag 12 Mei 2000

· ’n Pelserkwota van 65 000 ton is gister deur plakkaatswaaiende vissers van Walvisbaai van die Minister van Visserye, dr. Abraham Iyambo, opgeëis.

· Die Windhoekse munisipaliteit word daarvan beskuldig da thy kennisgewings vir die hernuwing van hondelisensies doelbewus van troeteldiereienaars weerhou om geld uit boetes te genereer.

· Die brose vredesproses in die Demokratiese Republiek die Kongo (DRK) beleef die soveelste terugslag deurdat troepe van Rwanda en Uganda in hewige gevegte in die Kisangani-omgewing gewikkel is.

· Groot vreugde wag môre op enkele kaartjiehouers in die Wanderers-sportklub se Millennium-Miljoendollar-trekking.