193 skole het 'kritieke' behoefte aan water, sanitasie

Henriette Lamprecht – Verskeie skole in die land is nie gerat vir onderwysers wat Maandag op die laaste landswyd weer op hul poste moes wees nie.Die Onderwysersunie (TUN) en die Namibiese Nasionale Onderwysersunie (Nantu) is beide dit eens dat verskeie skole nie voorkomingsmaatreëls volgens riglyne van die Wêreldgesondheidsorganisasie (WHO) in plek het om personeel teen Covid-19 te beskerm nie. Dit sluit handreinigers, maskers en lopende water in. Volgens Nantu se sekretaris-generaal, mnr. Naftal Shigwedha, het verskeie nie water nie en sluit dit skole in Windhoek in.“Die kwessie van gesondheid en veiligheid is ‘n prioriteit. Ek kan nie sien hoekom dit nie aangespreek is voordat onderwysers by skole moes aanmeld nie.”Hy het personeel se terugkeer na skole en koshuise as “’n gejaagde besluit” beskryf en gesê sommige skole is afhanklik van boorgate wat nie meer water het nie.“Om van onderwysers te verwag om sonder water te werk, is nie ‘n deurdagte besluit nie.”Shigwedha het verwys na afdeling 42 van die arbeidswet wat bepaal ‘n werknemer het die reg om sy werksplek te verlaat sou sy of haar gesondheid in die gedrang is. Hy wou ook weet hoe skole die sosiale afstand tussen personeellede gaan toepas en of skole maskers aan personeel gaan voorsien.Me. Toini Nayoma van die Onderwysersunie (TUN) het op haar beurt gesê die ministerie het “vir veels te lank” geen respek vir riglyne met betrekking tot water en sanitasie by skole gehad nie.“Covid-19 het net gekom om ons daaraan te herinner dat gesondheid nie agterweë kan bly nie,” het sy gesê.Die adjunk- uitvoerende direkteur vir finansies en administrasie in die ministerie van onderwys, kuns en kultuur, mnr. Knox Otto Imbuwa, het egter gesê hy vind dit vreemd dat skole eers vir onderwysers “reggemaak” moet word voordat hulle terugkeer.“Hulle is deel van die skoolomgewing en deel van die proses om skole gereed te kry,” het hy gesê.Volgens Imbuwa is ‘n bepaling reeds deur die ministerie gedoen van watter skole infrastruktuur kort, sowel as die fondse nodig om dit beskikbaar te stel. Imbuwa sê 193 skole het ‘n “kritieke behoefte” aan water en sanitasie.Hy het beklemtoon onderwysers speel ‘n sleutelrol in die terugkeer van leerlinge na klaskamers en ‘n stel riglyne wat deur die ministerie saamgestel en uitgereik is, dui elkeen se onderskeie rol in die volgende paar maande aan.Imbuwa het erken die ministerie het finansiële beperkinge en het verwys na elke skool se ontwikkelingsfonds waaruit geld gekanaliseer sal word om met aankope van onder meer maskers te help.“Tien tot 15 persent van die ontwikkelingsfonds mag gebruik word om Covid-verwante noodsaaklikhede soos maskers en handreinigers aan te koop,” het hy gesê. - henriette@republikein.com.na

193 skole het 'kritieke' behoefte aan water, sanitasie

Kommentaar

Republikein 2025-09-19

Meld asseblief aan om kommentaar te lewer

193 skole het 'kritieke' behoefte aan water, sanitasie

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie