18-jarige sterf in brand

'n Brand op Otjimbingwe het Vrydag die lewe van die 18-jarige me. Memory Anana Garises geëis.

Volgens die Namibiese polisie se misdaadverslag het die brand omstreeks 00:30 by 'n sinkhuis in Otjimbingwe se sentrale gebied uitgebreek.

"Die bure kon daarin slaag om die brand te blus, maar alle besittings is deur die vlamme verwoes, en Garises het aan ernstige brandwonde beswyk," sê die polisie.

Die oorsaak van die brand is onbekend en die polisieondersoek duur voort.

BEWEERDE VERKRAGTINGS

Twee verkragtings het glo die naweek plaasgevind.

Na wat verneem word, is 'n meisie (13) Saterdag tussen 03:00 en 04:00 in 'n huis in Noordoewer se Uitbreiding 3 verkrag.

'n Namibiese man (20) is in verband met die voorval in hegtenis geneem en die polisieondersoek duur voort.

'n Swanger vrou (19) is ook Saterdag glo deur 'n 40-jarige man naby Eenhana verkrag.

Die voorval het omstreeks 01:00 in die Eenyika-nedersetting plaasgevind toe die vrou, wat 'n maand swanger is, geslaap het.

Die verdagte het op die vlug geslaan.

"Die verdagte is aan die polisie bekend en die ondersoek duur voort," sê die polisie.

VERMEENDE ROWER GESKIET

Op die Kwasa-Kwasa-sakeperseel in Evelinestraat in Greenwell, Wanaheda, is 'n vermeende gewapende rower (22) Sondag omstreeks 03:20 in sy regtervoet geskiet.

"'n Groep van vyf mans het twee mans na bewering by hul eiendomme beroof. Toe die polisie by die toneel opdaag, het die vyf verdagtes op die vlug geslaan en skote afgevuur. Een van hulle is in die voet getref," sê die polisie.

Hy is vir behandeling hospitaal toe geneem.

Die verdagte verkeer in 'n stabiele toestand en is tans by die Wanaheda-polisiekantoor in aanhouding.

Die polisieondersoek duur voort.