115 nuwe gevalle, drie sterftes

Die adjunkminister van gesondheid en maatskaplike dienste, dr. Esther Muinjangue, het 115 nuwe Covid-19-gevalle en drie Covid-19-verwante sterftes aangekondig. Die drie sterftes is onderskeidelik in Windhoek, Rundu en Otjiwarongo aangeteken. Dit sluit 'n 50-jarige man in Windhoek, 'n 37-jarige vrou in Rundu en 'n 83-jarige man in Otjiwarongo in. Al drie het onderliggende mediese toestande gehad. Dit bring die totale getal sterftes vir die land op 101 te staan.

Uit die 115 nuwe gevalle is 62 mans en 53 vroue. Die jongste is sewentien dae oud en die oudste 69 jaar oud. Uit die 115 nuwe gevalle is 60 in Windhoek, 19 in Rehoboth, vyf in Mariental, sewe in Usakos, vier in Walvisbaai, een in Swakopmund, drie in Okahandja, twee in Otjiwarongo, een in Okakarara, vyf in Keetmanshoop, drie in Outapi, twee in Rundu en een elk in onderskeidelik Tsumeb, Gobabis en Katima Mulilo aangeteken.

Muinjangue sê nog 732 het herstel wat die getal nou op 6 543 te staan bring. Dit sluit 618 in Khomas, 58 in Kavango-Oos, 27 in Hardap, 14 in Ohangwena, agt in Oshana, vier in //Kharas en drie in Kavango-Wes in. Die aktiewe gevalle staan huidig op 3 075 waarvan 20 baie ernstig of kritiek is. Dit sluit een baie ernstige en vier kritieke gevalle in Erongo, vyf baie ernstige en nege kritieke gevalle in Khomas en een kritieke geval in Oshana in.

Huidig word 9 881 kontakte gemonitor, 80 352 weefselmonsters is tot op hede getoets en 1 112 mense is huidig in kwarantyn in geriewe oraloor in die land.