Waarskuwing: Swaar storms tot Saterdag

Elvira Hattingh - Terwyl ’n vrou van Otjiwarongo Woensdag gesterf het toe reënwater haar meegesleur het, waarsku die Namibiese weerkantoor nog swaar storms kan tot Saterdag oor groot dele van die land voorkom. “Dit sal na verwagting tot kitsvloede lei,” het die Namibiese weerkantoor se hoofweervoorspeller, mnr. Odillo Kgobetsi, gister gewaarsku. In ’n weerwaak sê Kgobetsi dit geld vir die Zambezi-, Kavango-Oos-, Kavango-Wes-, Oshana-, Ohangwena-, Omusati-, Oshikoto-, Otjozondjupa, Omaheke- en Khomasstreek. Hy waarsku Namibiërs in dié gebiede moet die nodige voorsorgmaatreëls tref.Kgobetsi sê ook die weer sal na verwagting teen láát Saterdag oor die sentrale noordelike dele van die land opklaar.Dit volg ná groot dele van die land sedert veral Woensdag sterk reën ontvang het, met mense wat laat weet het dit het tot 100 mm op Ondangwa gereën, terwyl foto’s wys hoe huise op Oshakati in die water gestaan het.NamWater het aangedui die Friedenaudam het water begin kry, terwyl foto’s gesirkuleer is van Gobabis se Daan Viljoendam, wat dolleeg was en sy eerste water gekry het.Intussen het die weerkantoor gisteroggend laat weet hul weerstasie op Ondangwa het 65 mm reën gemeet, terwyl 53 mm op Rundu gemeet is en 51 mm op Oshakati. Op Okahao het reënmeters op 27 mm gestaan, op Otjiwarongo is 18 mm gemeet en 7 mm op Katima Mulilo. By die Internasionale Lughawe Hosea Kutako is 13 mm reën gemeet, terwyl Gobabis 47 mm reën gehad het en Khorixas 8 mm. Die weerkantoor sê op Nkurenkuru het dit 5 mm gereën, op Outjo 4 mm en op Opuwo 2 mm. Op die plaas Okahua in die Khomasstreek het dit 46 mm gereën en op die plaas Otjikururume, naby Omatako, 16 mm.Boere noord van Grootfontein in die Abenab- en Maroelaboom-omgewing het teen gisteroggend tussen 30 mm en 38 mm ontvang, terwyl Tsumeb ook reën gekry het.GERUGTE OOR VLOEDEIntussen loop Namibië nog nie die gevaar vir vloede nie, ongeag swaar reënneerslae in Angola.Me. Paulina Mufeti, hoof van hidrologie by die Namibië hidrologiese dienste, het gister gesê hulle verwag nog nie vloede nie. Sy sê hoewel die Angolese regering laat weet het hulle het swaar, gelokaliseerde reën by Ondjiva in Angola ontvang, sal vloedwaters in strome en kanale optel, maar dit sal waarskynlik nog nie na Namibië se vloedvlaktes deurdring nie. Hiervoor is meer reën in die veel groter Cuvelai-stelsel nodig.“Die opvangsgebied is baie groot en tans is vloede nie werklik ’n gevaar nie.“Ons sien wel ’n verhoogde vloei van water by sommige van ons stasies op die Angolese grens, maar dit is nog baie laag – eintlik net enkele sentimeters diep. Ons hou die situasie fyn dop,” het sy gesê.Mufeti meen dié prentjie kan verander indien sterk reën in Angola tot byvoorbeeld die einde van Desember of vroeg Januarie voortduur.VROU STERFAo. Maureen Mbeha, polisiewoordvoerder in die Otjozondjupastreek, het mense gewaarsku om nie strome reënwater te probeer oorsteek nie – veral omdat nog reën verwag word. Sy het aan Nampa bevestig me. Elise Shafooli (30) van Otjiwarongo is dood ná sy Woensdagaand saam met drie ander vroue ’n rivier by die Ombili-nedersetting wou oorsteek en weggespoel het.Dit het gebeur kort ná dit in die gebied gereën het. Die ander vroue het die polisie van die voorval in kennis gestel. Haar liggaam is gister naby Otjiwarongo se weermagbasis gevind. - elvira@republikein.com.na

Waarskuwing: Swaar storms tot Saterdag

Kommentaar

Republikein 2025-07-07

Meld asseblief aan om kommentaar te lewer

Waarskuwing: Swaar storms tot Saterdag

Kommentaar

Republikein 2025-07-07

Meld asseblief aan om kommentaar te lewer

MELD AAN

Advertensie