Gewilde SA sanger kom kuier

Iréne-Mari van der WaltGobabis Gimnasium beplan kleurvolle mondigwording Alida Hill, Skoolhoof; “Die fees is ’n partytjie met oudskoolhoofde en -leerlinge…”Die gemeenskap van Gobabis gaan eerskomende naweek behoorlik makietie hou met die viering van Gobabis Gimnasium se 21ste verjaardag. Die fees wat vanaf 24 tot 27 Februarie gehou word, sal nie net terugflits na die afgelope 21 jaar nie, maar sal ook tradisies en waardes vir die volgende 21 jaar vaslê, sê Gobabis Gimnasium se skoolhoof, Alida Hill.Die vieringe skop af met ’n duathlon wat leerlinge gaan uitdaag om 15 km fiets te ry en 3 km te draf. Daarna sal ’n jolige kleurfees aangebied word. Leerlinge sal dan met verfpoeier kan baljaar. ’n Sokkie maak ook deel uit van die feesprogram en sal ná die kleurfees begin.Ná al die opskopaktiwiteite sal die leerlinge die Vrydagoggend tydens skooltyd van hul skool se geskiedenis leer.“Die hele fees is ’n partytjie met oudskoolhoofde en -leerlinge, want die kinders wat nou hier is, weet nie eintlik iets van die skool se geskiedenis af nie,” sê Hill.Vir die sportmanne en -vroue wat die vorige dag nie genoeg oefening by die duathlon gekry het nie, word daar Vrydag atletiek aangebied. Hierdie atletiek het egter ’n kinkel in die kabel en sal die goue stemme en energieke trompoppies van die skool ook ’n kans gun om ’n kreet vir toekomstige byeenkomste te ontwikkel. “Ons het klaar ons interhuis gehad, dus het die Springbokke en die Rooibokke klaar teen mekaar meegeding, maar nou kompeteer die verskillende grade teen mekaar,” sê sy. Leerlinge gaan egter tydens die atletiek hul kragte moet spaar, want Vrydagaand kuier die immergewilde Suid-Afrikaanse sanger Brendan Peyper by die fees. Feesgangers sal Vrydagnag goed moet uitrus om vars vir Krieket Namibië die volgende dag te wees.“Ons hou ’n ses-aan-’n-kant-kriekettoernooi, so daar is spanne van Windhoek wat teen ons kom meeding, en dan het ons ook netbal, maar dit is ’n Gobabis-liga,” sê Hill.Daar sal ook vlugbal-, toutrek- en golfkompetisies gehou word. Saterdagaand sal stigterslede en die skoolgemeenskap bymekaarkom vir ’n formele dinee voor die program die volgende oggend met ’n erediens afsluit. Hill sê Gobabis Gimnasium is ongelooflik dankbaar vir die menigte borge wat hierdie fees moontlik maak. Die skool se platinum borg, Gobabis Toyota, sorg jaarliks vir finansiële steun van meer as N$100 000 aan die skool. FOTO BYSKRIF: Gobabis Gimnasium gaan hierdie naweek seker maak dat die groot 21 hulle nie stilletjies verbygaan nie. Foto Iréne-Mari van der Walt

Gewilde SA sanger kom kuier

Kommentaar

Republikein 2025-12-15

Meld asseblief aan om kommentaar te lewer

Gewilde SA sanger kom kuier

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.