Tien sterfgevalle weens mens-dier-konflik in 2025

Tien mense het gedurende die 2025-’26-boekjaar weens mens-dier-konflik gesterf waartydens 1 442 voorvalle by die ministerie van die omgewing, bosbou en toerisme, aangemeld is.

In reaksie daarop het die regering N$1,4 miljoen aan vergoeding aan geraakte gemeenskappe uitbetaal, terwyl bykomende ondersteuning aan die families van slagoffers verskaf is. 

“Die omvang van die voorvalle beklemtoon egter die toenemende uitdagings om wildbewaring met die veiligheid van mense te balanseer, veral in gebiede waar gemeenskappe tussen en naby aan wilde diere leef,” het minister Indileni Daniel tydens haar begrotingsmotivering gesê. 

Vir die 2026-’27-boekjaar is N$736,8 miljoen aan die ministerie toegeken – ’n vermindering van 7% teenoor die vorige begroting. 

Meer krities is die bedryfsbegroting met 8% gesny, wat verhoogde spanning op bewaringspogings in die voorste linie plaas, insluitend wildmonitering, wetstoepassing en vinnige reaksie op konflikvoorvalle.

Daniel het gesê dat die ministerie, ondanks uitdagings, steeds baie in die bestuur van beskermde gebiede bestee. 

’n Gekombineerde N$355,22 miljoen is aan programme een en twee toegeken, wat Namibië se netwerk van 20 nasionale parke ondersteun – wat ongeveer 17% van die land se grondgebied beslaan.

Hierdie parke het in 2025 N$183 miljoen in inkomste gegenereer, wat hul ekonomiese waarde beklemtoon.

Volgens haar bly kommunale bewaringsgebiede ’n sleutelpilaar in die bestuur van mens-dier-konflik sowel as bewaring. 

In 2025 het bewaringsgebiede inkomste van N$106 miljoen gegenereer, met N$19 miljoen wat weer in plaaslike ontwikkelingsprojekte belê is, soos elektrifisering in landelike gebiede, landbou en onderwys. 

“Hierdie inisiatiewe speel ’n deurslaggewende rol om veerkragtigheid te bou in gemeenskappe wat die meeste deur wildverwante risiko’s geraak word,” het die minister gesê.

Terselfdertyd bly wildstropery die druk op bewaringspogings vererger. In 2025 het Namibië 41 renosters en vier olifante aan die hand van wildstropers verloor.

Teenstropery-reaksies is verskerp, insluitend die 147 renosters wat onthoring is, asook doelgerigte wildverskuiwings om druk in hoë-konflikgebiede te verminder.

Daniel het gesê bewaring wat met toerisme verbind is, het ook aansienlike voordele lewer. Konsessies wat aan gemeenskappe naby beskermde gebiede toegeken is, het 121 werksgeleenthede geskep, wat die skakel tussen bewaring, ekonomiese geleenthede en plaaslike ondersteuning vir wildbewaring versterk.

– [email protected]