Pa’s moet borsvoeding ondersteun

Die verteenwoordiger van die Verenigde Nasies se Kinderfonds (Unicef) in Namibië, Samuel Ocran, het pa’s aangemoedig om op te hou om met hul pasgeborenes “mee te ding” vir hul ma’s se aandag en eerder aktiewe vennote te word in die ondersteuning van borsvoeding.

Hy het tydens die herdenking van Wêreldborsvoedingsweek by die Windhoek Sentrale Hospitaal gesê pa’s speel ’n belangrike rol om te verseker dat ma’s suksesvol kan borsvoed.

“Jou rol begin nie wanneer jou kind begin loop nie. Dit begin lank voor dit. Wanneer jou vrou doodmoeg is ná ’n slapelose nag, is jy veronderstel om haar te help. 

“Wanneer jou vrou onseker is, moedig haar aan. Wanneer sy tyd nodig het om te borsvoed, beskerm daardie tyd. Wanneer ander verkeerde inligting oor borsvoeding versprei, staan by haar,” het Ocran gesê.

Hy het beklemtoon dat borsvoeding nie net ’n ma se verantwoordelikheid is nie. 

“Elke pa wat ’n borsvoedende maondersteun, belê in die krag en toekoms van sy kind.” 

Ocran het borsmelk beskryf as veel meer as net voedsel en gesê dit voed, beskerm en versterk kinders vanaf die eerste dag van hul lewe. 

Dit verminder die risiko van infeksies en ondersteun gesonde breinontwikkeling. Ma’s trek ook voordeel uit ’n laer risiko vir bors- en eierstokkanker asook tipe 2-diabetes.

“Dit is een van die slimste beleggings wat ons kan maak,” het Ocran gesê.

Sy opmerkings kom te midde van kommer deur die ministerie van gesondheid en maatskaplike dienste oor borsvoedingsyfers in Namibië.

SMART-opname

Die adjunkminister van gesondheid, Suzan Ndjaleka, het gesê die SMART-voedingsopname van 2024 het bevind dat net 49% van babas tussen nul en vyf maande oud uitsluitlik geborsvoed word.

Vroeë borsvoeding staan op 63,6%, terwyl voortgesette borsvoeding onder kinders tussen 12 en 23 maande tot 36% gedaal het. Bottelvoeding is by 34,1% aangemeld.

Ndjaleka het gewaarsku dat die syfers daarop dui dat baie kinders te vroeg aan ander kosse blootgestel word, wat hul risiko vir wanvoeding en chroniese siektes verhoog.

“Hierdie syfers sê vir ons dat ons kinders te vroeg van borsmelk gespeen word, dikwels met onvoldoende aanvullende voedsel, wat hulle direk blootstel aan die risiko’s van wanvoeding en chroniese siektes. Ons moet hierdie narratief verander,” het sy gesê.

Sy het herhaal dat babas vir die eerste ses maande van hul lewe uitsluitlik geborsvoed moet word voordat veilige en voedsame aanvullende voedsel ingebring word, terwyl borsvoeding tot die ouderdom van twee jaar en langer voortgesit word.

BORSVOED LANGER

Die waarnemende adjunkdirekteur van die gesinsgesondheidsafdeling, Marjorie van Wyk, het gesê hoewel byna alle babas met geboorte geborsvoed word, gaan baie min voort met borsvoeding tot die aanbevole ouderdom.

“Ons wil hê dat 100% van kinders op tweejarige ouderdom en daarna steeds geborsvoed word,” het sy gesê.

Van Wyk het gesê volhoubare ondersteuningstelsels is noodsaaklik, vanaf voorgeboortelike berading tot praktiese ondersteuning ná geboorte.

Sy het gesê gemeenskappe moet ook slegs borsvoeding aanvaar en ondersteun en dat hulp verder as gesondheidsgeriewe moet strek.

“Ons moet ons stelsels so sterk bou dat as ’n sekuriteitswag ’n bottel of fopspeen by die hek sien, hulle dit wegneem om borsvoeding aan te moedig,” het sy gesê.

Om borsvoeding te bevorder, het Ndjaleka gesê die ministerie sal die “Tien stappe tot suksesvolle borsvoeding” in kraamsale, voorgeboorteklinieke en gesondheidsgeriewe landswyd uitrol. 

Die inisiatief sluit opleiding vir gesondheidswerkers in om bekwame berading en praktiese ondersteuning aan moeders te bied.

Sy het ook ’n beroep op werkgewers gedoen om borsvoedingsvriendelike werkplekke te skep deur voldoende kraamverlof, borsvoedingsruimtes en buigsame werkreëlings te voorsien.

Gemeenskappe is aangemoedig om borsvoeding te normaliseer, terwyl pa’s ’n meer aktiewe rol moet speel in die ondersteuning van ma’s.

Wêreldborsvoedingsweek word onder die tema: “Prioritiseer borsvoeding: Skep volhoubare ondersteuningstelsels” herdenk.