Omusati se goewerneur maan oor misdaad, malaria

Beduidende vordering is gedurende die afgelope finansiële jaar in landbou, onderwys, infrastruktuur en jeugontwikkeling in die Omusatistreek gemaak.

Stygende misdaadsyfers en malariagevalle is egter steeds ’n rede tot kommer.

Die goewerneur van die streek, Immanuel Shikongo, het dié opmerkings tydens sy onlangse streekrede op Outapi gemaak.

Hy het ook gemaan dat misdaad met 4% toegeneem het – van 3 525 voorvalle in 2024-’25 tot 3 670 in 2025-’26.

Shikongo het gesê huishoudelike en geslagsgebaseerde geweld (GBV) is steeds ’n groot bron van kommer, met 465 GBV-voorvalle en 204 voorvalle van fisiese kindermishandeling wat gedurende die oorsigtydperk aangeteken is.

“Ek doen dus ’n beroep op alle rolspelers om die kultuur van stilte te verbreek en oortreders aanspreeklik te hou, om seker te maak dat die regte van elke kind beskerm word,” het hy gesê.

Shikongo het gesê die streek bly verbind om ontwikkeling in ooreenstemming met president Netumbo Nandi-Ndaitwah se beroep op “geen besigheid soos gewoonlik nie” te versnel.

“Ek doen dus ’n beroep op alle rolspelers in ontwikkeling om hul prestasie tot die maksimum te bevorder terwyl hulle ’n rol speel om die sesde nasionale ontwikkelingsplan, Swapo se verkiesingsmanifes vir 2024 en die implementeringsplan daarvan te verwesenlik,” het hy gesê.

Shikongo het gesê die regering het N$14,5 miljoen belê om die infrastruktuur vir watervoorsiening by die Etunda-besproeiingskema te herstel en op te gradeer, asook N$900 000 vir die oprigting van ’n koelkamer om landbouproduksie te bevorder.

Hy het gesê Etunda het 1 371 ton mielies van 270 hektaar geproduseer, saam met aartappels, koring, waatlemoene en ’n proefprojek vir die verbouing van piesangs wat reeds geoes en bemark is. Die regering het ook N$1,5 miljoen in landbousubsidies belê wat 8 353 boere bevoordeel het, terwyl N$1,6 miljoen pluimvee- en tuinbouproduksie vir 177 boere ondersteun het.

Om onderwysinfrastruktuur te verbeter, het die regering N$5 miljoen in klaskamers en ablusiegeriewe belê, 37 klaskamers opgeknap, 112 werksgeleenthede geskep en ’n verdere N$5,5 miljoen aan voertuie bestee om onderwysdienste te ondersteun.

JEUG

Oor jeugindiensneming, het Shikongo gesê Outapi se dorpsraad het 87 kontrakwerkers teen ’n koste van N$2 miljoen in diens geneem.

Dit terwyl die Maatskaplike Voorsorgkommissie se ontwikkelingsfonds N$2,6 miljoen in die Okalonda-jeugbaksteenprojek belê het, wat tien werksgeleenthede geskep het. Die ministerie van justisie en arbeidsverhoudinge het ook 146 van 576 geregistreerde werksoekers in diens geplaas.

Ten spyte van die vooruitgang in ontwikkeling, het hy kommer oor die streek se gesondheidsuitdagings uitgespreek.

“Die Omusatistreek het ’n hoë syfer van malariagevalle aangeteken, met ’n totaal van 7 410 gevalle wat gedurende die oorsigtydperk bevestig is. 

“Dit is hartseer om te rapporteer dat die streek 12 sterftes as gevolg van malaria aangemeld het,” het Shikongo gesê.

Hy het inwoners aangespoor om “waaksaam te wees en gesondheidsgeriewe te besoek as hulle ongesteld voel”.

Shikongo het verder groot beleggings in infrastruktuur uitgelig. Dit sluit die watervoorsieningskema, Litapa-Okeeholongo, van N$86,9 miljoen in, asook N$206,1 miljoen vir die vervanging van die Ogongo-Oshakati-waterpyplyn en N$123 miljoen vir die opgradering van die Outapi-watersuiweringsaanleg.

Hy het gesê verskeie projekte in die streek word geprioritiseer.

Dit sluit onder meer ’n tamatieverwerkingsaanleg van N$21 miljoen in, asook ’n Ruacana Suid-pyplynprojek van N$20 miljoen, uitgebreide toerisme-infrastruktuur gefokus op die Ruacana-waterval en die Omugulugwombashe-gedenkteken en die vestiging van ’n Ogongo landelike ontwikkelingsentrum ter waarde van N$50 miljoen. – [email protected]