Meer druk ná Pepfar se uitfasering

Die ministerie van gesondheid en maatskaplike dienste sê meer as 220 000 Namibiërs wat met MIV leef en antiretrovirale behandeling (ART) ontvang, sal steeds toegang tot die lewensreddende medisyne hê terwyl die land hom van Amerikaanse befondsing speen, maar het gewaarsku dat verskeie ondersteuningstelsel onder druk kan kom.Die ministerie se woordvoerder, Walters Kamaya, het gister aan Republikein gesê die regering sal voortgaan om antiretrovirale (ARV)- medikasie te befonds en MIV-behandeling by openbare gesondheidsgeriewe te verskaf.Hy het beklemtoon dat die oorgang weg van ondersteuning deur die Amerikaanse President se Noodplan vir Vigsverligting (Pepfar) nie pasiënte se toegang tot behandeling sal benadeel nie.“Pasiënte behoort gerusgestel te word dat ART ’n noodsaaklike nasionale gesondheidsdiens is en nie as ’n opsionele, skenkerbefondsde program behandel sal word nie,” het Kamaya gesê.Hy het egter erken dat MIV-voorkoming en -toetsing, gemeenskapsgebaseerde dienste, tegniese ondersteuning, monitering en evaluering, kliniese mentorskap en ander ondersteuningsprogramme onder die gebiede is wat die waarskynlikste uitdagings sal ervaar namate Namibië groter verantwoordelikheid aanvaar om sy MIV-reaksie te befonds.Amerika het vroeër vandeesmaand in ’n gesamentlike mediaverklaring aangekondig dat Namibië vir die 2027-boekjaar na verwagting sowat US$45 miljoen (ongeveer N$730 miljoen tot N$750 miljoen) in finansiële ondersteuning sal ontvang, voordat direkte befondsing grootliks uitgefaseer word ten gunste van tegniese samewerking.Kamaya het egter gesê Namibië sal nie noodwendig die volle US$45 miljoen uit sy nasionale begroting hoef te vervang nie.“’n Gedetailleerde kosteberekening is nodig om te bepaal watter funksies deur die regering oorgeneem moet word, watter in bestaande gesondheidsdienste geïntegreer kan word, en watter ander deur alternatiewe befondsingsmaatreëls ondersteun kan word en waar doeltreffendheid bereik kan word,” het hy gesê. Kamaya het gesê MIV-voorkoming- en behandelingsdienste sal steeds by openbare gesondheidsgeriewe oraloor die land gelewer word, met die regering wat ook MIV-toetsstelle en laboratoriummonitering befonds.Hoewel die beskikbaarheid van ARV’s as veilig beskou word, het Kamaya gesê tegniese ondersteuning, MIV-voorkoming en -toetsing, monitering en evaluering en gemeenskapsgebaseerde dienste die gebiede is wat die meeste blootgestel is aan die vermindering in Pepfar-ondersteuning.Hy het gesê maatreëls word ingestel om diensonderbrekings te voorkom, insluitend die integrasie van kritieke, ekstern befondsde poste in regeringstrukture waar dit haalbaar is, die prioritisering van skaars tegniese kundigheid en die uitbreiding van kontrakte met gemeenskapsorganisasies op grondvlak.Namibië befonds reeds die verkryging van ARV’s deur sy nasionale gesondheidsbegroting, met ontwikkelingsvennote wat waar nodig aanvullende ondersteuning bied.Kamaya het egter gewaarsku dat die handhawing van Namibië se 96-98-98-prestasie meer sal verg as om bloot te verseker dat ARV’s beskikbaar bly.“Toetsing en gevalopsporing, die aanvang van behandeling, ondersteuning vir nakoming, virale monitering, kliniese mentorskap, laboratoriumdienste, die betrokkenheid van die gemeenskap en ’n bekwame gesondheidswerksmag sal alles kritiek wees,” het hy gesê. Kamaya het gesê die ministerie het verder die moontlike verlies van ervare gesondheidswerkers en tegniese kundiges, swakker kliniese mentorskap, verminderde gemeenskapsopvolg, laer voorkomings- en toetsingskapasiteit, probleme met datagehalte en laboratoriumleemtes onder die risiko’s geïdentifiseer.Namibië berei vir die oorgang voor deur sy MIV-volhoubaarheidsraamwerk, wat in 2018 ontwikkel en in 2019 bekend gestel is, asook die breër volhoubaarheids-padkaart vir MIV, tuberkulose (TB), malaria en virale hepatitis.Namibië se breër MIV-strategie mik op epidemiebeheer teen 2028 en om vigs teen 2030 as ’n openbare gesondheidsbedreiging te beëindig.– tueyimo@nmh-hub.com.na

Meer druk ná Pepfar se uitfasering

Kommentaar

Republikein 2026-09-18

Meld asseblief aan om kommentaar te lewer

Meer druk ná Pepfar se uitfasering

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.