Sop se gat

Mariselle Stofberg – Ek dink almal van ons het al een of ander tyd ’n dieet probeer volg met die hoop om van die ekstra vetjies ontslae te raak. Ons gesin het gedink dit is ’n goeie idee om ’n sopdieet te volg, wat blykbaar help om binne ’n week heelwat gewig af te skud. Ek dink gereeld ek gaan onmiddellik op ’n dieet gaan en alle kitskos en lekkernye uitsny, maar ek is hopeloos te lief vir kos. Ek besluit toe met mag en mening hierdie keer is ek dodelik ernstig. Die dieet is net vir een week, so hoe erg kan dit nou wees? Die dieet is ’n sop wat bestaan uit seldery, tamaties, uie, boontjies, wortels en soetrissie. Jy kan blykbaar soveel eet soos jy wil, solank jy nie enigiets anders eet nie. Nou en dan verras hulle jou met ‘’n bietjie groente hier en ’n verlore aartappel daar, maar eintlik is dit net sop. Die woorde ‘eet soveel soos jy wil’ is gewoonlik die mooiste woorde wat jy kan fluister en ook deels die rede hoekom ek gedink het hierdie dieet sal werk. Eet ten minste twee maal van die sop, en jy besef twee maal is genoeg. Dit is hoekom mense so blerrie baie gewig verloor, want ek eet eerder niks as dié sop.Maar ek en moeder het belowe ons sal nie cheat nie. By dag een se middagete is ek klaar oor-emosioneel, naar, kwaad en bewerig. Ek probeer die water met groente wat hulle sop noem afwurg, maar my oë traan en my maag pyn. My selfoon se bruin cover lyk soos ’n brötchen en ek dagdroom van kookkos, pannekoek en slaptjips. Die aand kry ons hond bietjie hoender (ja, ons is van die mense wat vir ons hond mensekos gee) en ek kwyl behoorlik oor die hond se hoender. Die trane loop, want al wat ek soek is net ’n happie hoender. Wie kon ooit so lus raak vir net ’n stukkie hoender. My ma loop tuin toe, en voor ek my kon kry sit ek met drie stukke hoender in my mond. Bella, ons hond, kyk my met soveel verwyt aan as wat sy moontlik kon bemeester, maar ek kan nie stop nie en voel nie in die minste skuldig nie. Die aand sit ek heel onskuldig in my kamer, nadat ek nog ’n bakkie haatwater afgewurg het, en hoor iets in die kombuis (of so sê ek vir myself). Ek loop honger-honger kombuis toe, en voor ek my kon kry sit ek met my kop in die koskas. Met my ma se verjaardag het sy hope sjokolade gekry, en voor ek my kon keer het ek een van die pakke oopgemaak en sit ek met een van die stukke in my hand. Ek hardloop so vinnig as wat ek kan met die stukkie sjokolade toilet toe, en daar, op die toilet, eet ek my skelm stukkie sjokolade. Dit is hier waar ek besef het ek het ’n probleem. ’n Groot probleem. Ek probeer die volgende dag van my sondes vergeet, want hoe kan my ma so sterk staan, maar ek kan dit nie eers deur twee dae van groente-water maak nie.Ek huil omrede ek honger is en huil verder oor ek huil omdat ek honger is. Ek probeer my beste om sterk te staan, en aan die einde van dag drie kry ek my ma na werk, en sy sê ons sal nou ry en kos koop, want hierdie blerrie sop se gat. Die kort en die lank: Ons gesin sopdieet nooit weer nie.

Sop se gat

Kommentaar

Republikein 2026-07-22

Meld asseblief aan om kommentaar te lewer

Sop se gat

Kommentaar

Republikein 2026-07-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.