Só skitter Notshe in Haai-revolusie

Tinus van Staden - Sikhumbuzo Notshe het die beste skuif van sy loopbaan gemaak deur die Kaap vir Durban te verruil. En die Haaie lag al die pad bank toe.Dié 26-jarige Springbok-agtsteman was ’n openbaring in die eerste vyf rondes in vanjaar se Superrugby-reeks. Die Haaie het vier van hul eerste vyf wedstryde gewen, waarvan vier oorsee was, en Notshe het ’n groot rol in hul sukses gespeel. Sy spelpeil is die beste van al die Suid-Afrikaanse agtstemanne s’n.As wetenskaplikes ’n Suid-Afrikaanse agtsteman in ’n laboratorium moes maak, sou Notshe nie die prototipe wees waarvan hulle sou werk nie. Hy is nie ’n kragreus soos Duane Vermeulen nie en ’n span het ’n baie spesifieke wedstrydplan nodig om die beste uit hom te haal. Hy sal byvoorbeeld nie by die Bulle inpas nie.’n Mens kan nie help om te wonder of hy dieselfde tipe invloed in Robert du Preez se Haaie-span sou hê nie.Maar vanjaar pas hy en die Haaie se nuwe speelstyl so goed bymekaar soos ’n Sondagaand en die agtuurfliek.Sean Everitt, die nuwe afrigter, en veral Brent Janse van Rensburg, die nuwe hulpafrigter, het vroeg besef hulle gaan spanne nie kan boelie nie. Hulle het nie die agttal daarvoor nie. Die swaargewigte Jean-Luc en Dan du Preez, Coenie Oosthuizen, Beast Mtawarira, Ruan Botha en Akker van der Merwe is almal vort.Die afrigtingspan het besef “lokval-rugby” is die beste plan vir hul jong groep met ligte, maar ratse en vaardige voorspelers (soos Notshe). Dit werk so: Die Haaie plaas enorme druk met hul opskietverdediging toe. Hulle gee nie om as hul teenstanders balbesit het nie, hulle lei hulle in ’n amperse lokval in deur hulle toe te laat om te speel.Maar sodra daar ’n fout gemaak word, slaan die Haaie blitsig en genadeloos toe. Die agterlyn loop oor van flair en hul afronding, wat in die Du Preez-era ’n kroniese migraine was, is skielik vyfster.Die gevaarlike agterlyn word deur Notshe gevoer. Hy is die skakel wat alles laat kliek.Notshe het ’n direkte invloed op vier van die Haaie se 19 drieë tot dusver gehad. Teen die Highlanders het hy twee drieë geskep – een met ’n drukaangee waarmee hy Aphelele Fassi in ’n gaping geplaas het en nog een nadat hy ’n bal by ’n teenstander afgeneem het, ver genael het en ’n sneller weggestuur het.Teen die Rebels het hy ’n rolskoppie van Fassi opgepik en Makazole Mapimpi met ’n blitsige kortaangee weggestuur. Die naweek het hy in Brisbane gebreek, gepypkan, ’n paar Reds afgestamp, die laaste verdediger getrek en die bal na Madosh Tambwe laat loop wat deurgesuiker het. Ook van omgekeerde besit af.Dit klink dalk nie na veel om te sê hy het vier drieë geskep nie, maar dis 21% en ’n beduidende hoeveelheid.Vergelyk dit met die Haaie se spelskepper Curwin Bosch (losskakel). Hy het nie teen die Hurricanes gespeel nie, maar in die wedstryde waarin hy gespeel het, het die Haaie 16 keer gedruk. Vier daarvan is deur sy steekskoppies, dwarsskoppe of goeie aangeë geskep. Sy bydrae is dus 25%, net ’n rapsie meer as Notshe s’n, wat ’n voorspeler is.Benewens sy vaart en flair, skram Notshe nie weg van die vuilwerk nie. Hy kan die kollig steel, maar ook die swaar rekwisiete regskuif sodat spelers soos Fassi en Mapimpi die applous kan kry.Die Haaie speel Saterdag teen die Jaguares in Durban en moet hul goeie spelpeil van die afgelope toer voortsit. Hul 19 drieë is die derde meeste in die reeks – net agter die Reds (22), wat voorverlede week teen die Sunwolves baljaar het, en die Jaguares (20).Hul dissipline, veral by die afbreekpunte, en skrums en lynstane kort werk, maar hulle is op die regte pad. En Notshe verdien baie krediet daarvoor. - Netwerk24

Só skitter Notshe in Haai-revolusie

Kommentaar

Republikein 2025-05-15

Meld asseblief aan om kommentaar te lewer

Só skitter Notshe in Haai-revolusie

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie