Nuwe rekord van 45 sterftes, 1 567 gevalle

Die Covid-sterftes vir die land sedert die uitbreking van die pandemie in Maart verlede jaar, het met 45 sterftes uit tien distrikte gestyg. Dit is die hoogste getal in 'n enkele dag. Die sterftes is egter nie oor 'n tydperk van 24 uur aangeteken nie, omdat daar volgens die ministerie van gesondheid en maatskaplike dienste 'n vertraging en oudit van sommige van die sterftes was. Die sterftes sluit dié in private en openbare hospitale sowel as die wat tuis (4) gesterf het in.
Vandag is 1 567 nuwe getalle, 'n positiewe koers van 42%, aangemeld. Hiervan is 284 leerlinge, 53 gesondheidswerkers, 30 onderwysers en 27 studente. In Windhoek is 620 nuwe gevalle aangeteken. Uit die bevestigde gevalle het net 33 (2%) reeds die eerste dosis entstof teen Covid ontvang.
Tans is daar 14 887 aktiewe gevalle, waarvan 533 in die hospitaal en 96 in die ICU is. Die herstelkoers daal tot 79% en tot op hede is 107 611 mense teen Covid-19 ingeënt.