Motoruitvoere kry rigting

Augetto Graig - Die Peugeot- en Opel-monteeraanleg op Walvisbaai moet steeds die struikelblok van ’n uitvoertarief oorkom, wat weens ooreengekome regulasies tussen Namibië en lede van die Suider-Afrikaanse Doeane-unie (SACU) toegepas word. Volgens dr. Michael Humavindu, adjunk- uitvoerende direkteur in die ministerie van nywerheidsontwikkeling en handel, belemmer die uitvoertarief die mededingendheid van Namibië se motoruitvoere na die buiteland. “Die ministeries van nywerheidsontwikkeling en finansies streef om ’n oplossing te vind met die huidige SACU-bepalings as grondslag. Die proses is aan die gang en dit moet vroeg in die eerste kwartaal van volgende jaar afgehandel wees. Die oplossing is nie net bedoel vir 'n spesifieke aanleg nie, maar om die ontwikkeling van Namibië se motorsektor te verseker,” sê hy.Die monteeraanleg van N$190 miljoen is amptelik in Desember 2018 deur pres. Hage Geingob geopen, toe is reeds 15 voertuie vervaardig.Die aanvanklike doelwit was om teen 2020 ongeveer 5 000 motors per jaar te vervaardig, maar selfs teen ’n hersiene teiken van sowat 1 500 kon die aanleg net daarin slaag om minder as 100 voertuie, naamlik Peugeot 3008, Peugeot 5008 en Opel Grandland X, te vervaardig.Toe die Franse ambassadeur in Namibië, me. Claire Bodonyi, in Augustus afskeid geneem het, het Geingob gesê die Franse aanleg bly in produksie om werksgeleenthede te beskerm. Ongeveer 22 Namibiërs is tans voltyds in diens by dié aanleg.Humavindu sê dat 51% van dié aanleg aan PSA Gruppe – die eienaars van beide Peugeot en Opel – behoort. Die Namibiese regering besit 49%.“Ja, daar word met die Namibiese owerhede oor dié nywerheidsaanleg gesels,” is al wat me. Salima Rahmaoui, die woordvoerder van PSA Gruppe in Afrika, gesê het. “In November 2020, by albei se raadsvergaderings en ’n jaarvergadering van aandeelhouers, is verhoudings volgehou om te verseker ons kom so spoedig moontlik by die oplossing en om doeltreffende produksie en transaksies te verseker,” sê Humavindu egter. “Die oponthoud word betreur, maar moet uit die oogpunt gesien word van ’n 25 jaar oponthoud in terme van SACU se motorbeleid,” sê hy.Intussen het die grootste SACU-motorvervaardiger, Suid Afrika, sy nuwe ontwikkelingsplan vir die motorsektor voltooi en die Motorproduksie-ontwikkelingsprogram Fase 2 (APDP2) moet in Julie 2021 afskop. “Namibië moet uit die Suid-Afrikaanse ervaring leer en probeer om dieselfde struikelblokke vermy,” sê Humavindu. Namibië moet nie te veel aandag op volumes plaas tot nadeel van plaaslike waardetoevoeging nie, sê hy.Die nuwe APDP is in lyn met die buurland se meesterplan vir sy motorsektor (2021-’35), wat volg op SACU se motorsektor-ontwikkelingsplan (1995 tot 2012), sê Humavindu. Dit ondersteun streekwye samewerking: “Dus word geleenthede vir die ontwikkeling van streek- en bilaterale waardekettings binne die motorsektor verbeter,” sê hy.Volgens Humavindu het Namibië ’n nasionale motormonterings- en vervaardigingsbeleid vir 2019 tot 2021. Hy sê dit is uiters belangrik, ná uitgerekte beleidsontwikkeling, om nou te verseker toekomstige gevalle soos met Peugeot en Opel word omseil, en beleggers kry die sekerheid wat hulle nodig het. “Ons het een of twee entiteite in die destydse uitvoerverwerkingsones gehad, maar maak min gebruik van dié aansporings ingevolge die SACU-bepalings, om die ontwikkeling van ons eie motorbedryf te verseker. Dit is nóú die tyd,” sê hy.- augetto@republikein.com.na

Motoruitvoere kry rigting

Kommentaar

Republikein 2025-05-15

Meld asseblief aan om kommentaar te lewer

Motoruitvoere kry rigting

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie