Marmermyn se werkers staak
Die werknemers se verteenwoordiger het die marmermyn op Karibib se bestuur van ’n agterbakse benadering tot die onderhandelinge beskuldig.
Otis Daniels – ’n Staking is Maandag by Best Cheer Investments gehou om die aandag te vestig op die nood van werkers by die Chinese onderneming op Karibib, waar marmer gemyn en verwerk word.
Mnr. George Ampweya, streekkoördineerder van die Mynwerkersunie (MUN) in die Erongostreek – en sedert 2014 ook die westelike streekkantoor van MUN se enigste bedingingsagent by Best Cheer Investments Namibia – het gesê hy was teleurgesteld in die manier waarop die werkgewer die salarisonderhandelinge vir 2019-’20 hanteer het.
Die werknemers het ná die uitreiking van die sertifikaat van ’n onopgeloste geskil op 17 Februarie 2021, ten gunste van ’n staking gestem en die betrokke prosesse aan die gang gesit.
Volgens Ampweya beplan hulle om ’n brief met hul eise aan die bestuur te oorhandig.
“Ons is ontmoedig deur die opsetlike verontagsaming van vasgestelde kollektiewe bedingingsbeginsels en die agterbakse manier waarop die onderhandelingspan onder leiding van sy regsbeampte, mnr. Chris Theron, opgetree het,” het Ampweya gesê.
Hy sê die vakbond het in Februarie namens sy lede en in pas met die Bestaande Erkennings- en Prosedure-ooreenkoms, die voorgestelde verbeterings aan salarisse en ander diensvoorwaardes deurgegee.
“Ná slegs een vergadering het die bestuur besluit om voort te gaan met ’n verhoging van nul persent. As redes het hulle ’n gespanne ekonomiese klimaat en ander Covid-19-verwante verskonings gegee.
“Met dit in gedagte het die vakbond sy aanvanklike voorstel hersien, maar dié is ook deur die bestuur se onderhandelingspan verwerp. Dit het tot ’n dooie punt gelei en die vakbond was gevolglik gedwing om in Maart die saak na die kantoor van die arbeidskommissaris te verwys.”
Ampweya het die bestuur van traagheid beskuldig en dat hulle geweier het om gehoor te gee aan die vakbond se eise om die werknemers se basiese salarisse aan te pas.
“Ons het ’n verhoging van die huidige N$3 070 tot N$4 270 voorgestel en ’n bedrag van N$700 wat sou dien as ’n behuisingstoelaag vir diegene wat in dorpsgebiede woon, asook ’n bostoelaag vir diegene wat op die maatskappy se perseel (by steengroewe) woon.”
‘TOTALE MISKENNING’
Ampweya sê die bestuur se onderhandelingspan se totale miskenning van ’n lewende loon is ongegrond en drakonies.
“Best Cheer Investments Namibië dra nie die belang van sy werknemers op die hart nie en wil eerder die land se hulpbronne melk deur goedkoop arbeid en slawelone.”
Ampweya sê Theron en sy span, selfs ná twee afsonderlike arbitrasievergaderings by die kantoor van die Arbeidskommissaris, het steeds met hul verhogingsaanbod van nul persent volgehou. Dit het daartoe gelei dat ’n sertifikaat van onopgeloste geskil uitgereik is.
Volgens hom dien dit nie net as ’n aanduiding dat die bestuur van Best Cheer Investments Namibia versuim om hul werknemers behoorlik te vergoed nie, maar ook as ’n duidelike aanduiding dat hulle daarop aandring om slawelone en onsekere arbeidsomstandighede vir werknemers te handhaaf.
Me. Lovina Plato, die menslike hulpbronbestuurder van Best Cheer Investments Namibia, het gesê die maatskappy sal ná oorweging van die werkers se brief aan die bestuur ’n amptelike mediaverklaring vrystel.
– [email protected]
Mnr. George Ampweya, streekkoördineerder van die Mynwerkersunie (MUN) in die Erongostreek – en sedert 2014 ook die westelike streekkantoor van MUN se enigste bedingingsagent by Best Cheer Investments Namibia – het gesê hy was teleurgesteld in die manier waarop die werkgewer die salarisonderhandelinge vir 2019-’20 hanteer het.
Die werknemers het ná die uitreiking van die sertifikaat van ’n onopgeloste geskil op 17 Februarie 2021, ten gunste van ’n staking gestem en die betrokke prosesse aan die gang gesit.
Volgens Ampweya beplan hulle om ’n brief met hul eise aan die bestuur te oorhandig.
“Ons is ontmoedig deur die opsetlike verontagsaming van vasgestelde kollektiewe bedingingsbeginsels en die agterbakse manier waarop die onderhandelingspan onder leiding van sy regsbeampte, mnr. Chris Theron, opgetree het,” het Ampweya gesê.
Hy sê die vakbond het in Februarie namens sy lede en in pas met die Bestaande Erkennings- en Prosedure-ooreenkoms, die voorgestelde verbeterings aan salarisse en ander diensvoorwaardes deurgegee.
“Ná slegs een vergadering het die bestuur besluit om voort te gaan met ’n verhoging van nul persent. As redes het hulle ’n gespanne ekonomiese klimaat en ander Covid-19-verwante verskonings gegee.
“Met dit in gedagte het die vakbond sy aanvanklike voorstel hersien, maar dié is ook deur die bestuur se onderhandelingspan verwerp. Dit het tot ’n dooie punt gelei en die vakbond was gevolglik gedwing om in Maart die saak na die kantoor van die arbeidskommissaris te verwys.”
Ampweya het die bestuur van traagheid beskuldig en dat hulle geweier het om gehoor te gee aan die vakbond se eise om die werknemers se basiese salarisse aan te pas.
“Ons het ’n verhoging van die huidige N$3 070 tot N$4 270 voorgestel en ’n bedrag van N$700 wat sou dien as ’n behuisingstoelaag vir diegene wat in dorpsgebiede woon, asook ’n bostoelaag vir diegene wat op die maatskappy se perseel (by steengroewe) woon.”
‘TOTALE MISKENNING’
Ampweya sê die bestuur se onderhandelingspan se totale miskenning van ’n lewende loon is ongegrond en drakonies.
“Best Cheer Investments Namibië dra nie die belang van sy werknemers op die hart nie en wil eerder die land se hulpbronne melk deur goedkoop arbeid en slawelone.”
Ampweya sê Theron en sy span, selfs ná twee afsonderlike arbitrasievergaderings by die kantoor van die Arbeidskommissaris, het steeds met hul verhogingsaanbod van nul persent volgehou. Dit het daartoe gelei dat ’n sertifikaat van onopgeloste geskil uitgereik is.
Volgens hom dien dit nie net as ’n aanduiding dat die bestuur van Best Cheer Investments Namibia versuim om hul werknemers behoorlik te vergoed nie, maar ook as ’n duidelike aanduiding dat hulle daarop aandring om slawelone en onsekere arbeidsomstandighede vir werknemers te handhaaf.
Me. Lovina Plato, die menslike hulpbronbestuurder van Best Cheer Investments Namibia, het gesê die maatskappy sal ná oorweging van die werkers se brief aan die bestuur ’n amptelike mediaverklaring vrystel.
– [email protected]
Kommentaar
Republikein
Geen kommentaar is op hierdie artikel gelaat nie