La Niña skop dalk nóú in

Elvira Hattingh – Terwyl die weerkantoor ‘n weerwaak vir vandag vir wydverspreide donderbuie oor die westelike helfte van die binneland uitgereik het, meen ‘n weerkenner die huidige La Niña-weerverskynsel sal haarself voorts laat geld.

Die onafhanklike landbouweerkundige, mnr. Johan van den Berg, het gister in ‘n spesiale vooruitskouing vir Namibië gesê reënvooruitsigte het nou bykans vir die hele Namibië verbeter, tot en met 25 Januarie.

Hy sê histories is die meeste La Niña-verskynsels geassosieer met bogemiddelde reënval oor Namibië, veral in die mid- tot láátsomer.

Dit stem ooreen met ‘n voorspelling deur die Namibiese weerkantoor se hoofweervoorspeller, mnr. Odillo Kgobetsi.

“Voortgesette reënbuie sal na verwagting die naweek in die noorde, sentrale en suidelike streke van die land voorkom en selfs wydverspreid op plekke wees.

“Daarteenoor sal koel, droë lug ná die naweek oor die Suide posvat,” het Kgobetsi gister aan Republikein gesê.

KOMENDE DAE

Van den Berg is optimisties oor Namibië se reënvooruitsigte oor die komende vier dae:

“Tussen 10 mm en 30 mm kan oor veral die sentrale tot noordwestelike dele reën, met selfs gedeeltes van die Namibwoestyn wat moontlik ligte neerslae kan kry.

“Meer as 20 mm kan dalk in die tydperk oor die meer suidelike dele, tot so ver as Keetmanshoop, voorkom,” meen Van den Berg.

“Vir die noordelike dele – noord van Windhoek en veral noord van Otjiwarongo, kan daar weer teen die einde van Januarie reën voorkom, gevolg deur ‘n droër periode tot in die middel van Februarie. Dan sal toestande vir reën opnuut gunstiger raak,” sê hy.

“Reëntoestande is ongunstig oor die sentrale tot suidelike dele van die land vanaf die laaste paar dae in Januarie tot die derde week in Februarie. Dit behoort egter weer te verbeter in die laaste deel van Februarie,” het Van den Berg gesê.

LA NIÑA

Hy sê die La Niña-weerverskynsel, wat in die middelste deel van Januarie 2022 ‘n piek bereik het, beloof steeds positiewe reënvooruitsigte in die laaste deel van die somer en herfs, tot in Mei.

“Die huidige La Niña se uitwerking op die reën was oor die algemeen later as normaal in Suid-Afrika, asook in ander wêrelddele. Dis dus baie waarskynlik dat dit dieselfde uitwerking op Namibië se reënval gaan hê en dat die invloed daarvan ook eers in die komende maande gaan inskop.

“Die vorige seisoen se La Niña het reeds ‘n piek aan die begin van Desember bereik. Dis ses weke vroeër as die huidige een. Dit kan die kanse op reën in die huidige seisoen verhoog, tot in Meimaand.”

Van den Berg herinner Namibiërs daaraan dat die reënseisoen “tradisioneel” vanaf Januarie tot Maart gesentreer is. Hy sê die La Niña-weerstoestande kan reënneerslae in hierdie tydperk verder aanmoedig.

Vanaf die middel van Februarie kan reëntoestande oor die noordelike dele van die land aansienlik verbeter. Nog later in Februarie kan die toestande ook suidwaarts uitbrei, met heelwat reën wat nog voor die winter kan val.

GEMEET

Die afgelope week het reënneerslae oor die meeste dele van die land verbeter.

Volgens die weerkantoor se amptelike rekords is gisteroggend 29 mm op Ondangwa gemeet, terwyl Grootfontein 22,6 mm en Windhoek 18,8 mm gehad het.

Op Gobabis het dit 12 mm gereën en op Okahandja 10,8 mm, terwyl Walvisbaai 8,2 mm reën gemeet het. Outjo, Mariental en Okaukuejo het onderskeidelik 7,6 mm, 5,2 mm en 2,6 mm gehad. Op Wlotzkasbaken teen die kus, het dit ook 6,7 mm gereën.

Op die Facebook-groep Reën in Namibia is laat weet dat reënmeters gisteroggend in Olympia, Windhoek, op 40 mm gestaan het, terwyl daar 26 mm reën in Hochlandpark gemeet is. Onderskeidelik 50 mm en 55 mm is in Auasblick en Klein Windhoek gemeet.

Nog ‘n Facebook-gebruiker het 33 mm op Ondangwa gemeet. Op Oshakati het dit 13 mm gereën, terwyl nog iemand laat weet het Otjiwarongo het ook 32 mm reën en baie stormagtige weer gehad.

Op ‘n plaas tussen Kalkrand en Maltahöhe is oornag 35 mm teen gisteroggend gemeet, terwyl die reën onverpoos voortgeduur het. - [email protected]