Katutura se noodeenheid opgeknap

Die ministerie van gesondheid en maatskaplike dienste, die Motorvoertuigongelukkefonds (MVAF) en Standard Bank Namibia het ’n opknappingsinisiatief vir die noodeenheid van die Katutura-staatshospitaal van stapel gestuur.Dié hospitaal het die grootste en bedrywigste noodeenheid in die land en dien as die hoofverwysingseenheid vir noodgevalle. Die spesifieke areas wat vir opknappingswerk geoormerk is, sluit in die herontwerp van die sekuriteits- en portierkamers om toegang tot die noodeenheid te beheer, ’n nuwe bybringsaal met agt beddens, die omskakeling van die huidige bybringsaal in ’n pediatriese eenheid, die uitbreiding van die ginekologiese ondersoekkamer, sowel as ’n nuwe stasie vir verpleegsters met kluise vir medikasie. Volgens die minister van gesondheid en maatskaplike dienste, dr. Kalumbi Shangula, sal die opknapping van die noodeenheid die vloei van pasiënte en aangewese areas verbeter om gepaste dienste en reaksie tot pasiënte te verseker. “Dit sal tydige sorg vir dié wat ernstig siek en beseer is, verseker en wat beteken hulle ontvang die beste moontlike sorg in die noodeenheid,” het hy gesê.Die voorsitter van Standard Bank se komitee vir korporatiewe maatskaplike beleggings, mnr. Jerry Muadinohamba, het gesê die noodeenheid in sy huidige vorm met oorlaaide geriewe kan nie langer die hoë invloei van pasiënte hanteer wat noodsorg en -behandeling vereis nie. “Ten spyte van die beste pogings van ons medici is daar net soveel wat hulle onder die huidige omstandighede kan doen. Ná afloop van die evaluering van die situasie het ons besluit om die regering se las te verlig en die bank se volle ondersteuning tot die voltooiing van die projek te beloof,” het Muadinohamba gesê.Die voorsitter van die MVAF, dr. Shitaleni Herman, het tydens die bekendstelling gesê die ingryping kom in ’n tyd wanneer die verwante instellings poog om doeltreffende verspreiding van hulpbronne midde die Covid-19-pandemie te handhaaf wat druk op die gesondheidstelsel plaas wat reeds oorlaai is. – Nampa

Katutura se noodeenheid opgeknap

Kommentaar

Republikein 2026-05-15

Meld asseblief aan om kommentaar te lewer

Katutura se noodeenheid opgeknap

Kommentaar

Republikein 2026-05-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.