Imalwa verduidelik Heinaste-transaksie

Ronelle Rademeyer - Die nagenoeg N$280 miljoen wat Tunacor Fisheries betaal het om die gekonfiskeerde maasbanker-fabriekskip MFV Heinaste by die Namibiese aandeelhouers van die Yslandse groep, Samherji Group, te koop, is nou deel van die bates waaroor kurators ingevolge ’n hofbevel waak.Die polisie het die vaartuig verlede jaar gekonfiskeer kort nadat die bom oor Fishrot gebars en Samherji se beweerde betrokkenheid by dié omvangryke maasbankerkwota-skandaal aan die lig gekom het. Samherji het Woensdag in ’n verklaring gesê die verkoopstransaksie met Tunacor is voltrek, en die vaartuig is na die Tutungeni herdoop.“Die afgelope maande is pogings aangewend om die bedrywighede van Samherji-geaffilieerde maatskappye in Namibië te beëindig. Dit is in oorleg met die Namibiese owerhede gedoen,” sê Samherji en voeg by deel van die taak was om die lot van die Heinaste te bepaal. Die maatskappy sê verder die beslaglegging is opgehef nadat die aanklaer-generaal van Namibië, me. Martha Imalwa, Dinsdag ’n brief in dié verband onderteken het.Imalwa het gister by navraag aan Republikein verduidelik sy het nie die beslaglegging gelig nie, maar die polisie het.Sy sê hoewel sy ingevolge die Wet op die Voorkoming van Geörganiseerde Misdaad (Poca), nr. 29 van 2004, by die hoërhof in Windhoek aansoek gedoen het dat beslag gelê word op die bates van die Fishrot-6 en die maatskappye en beslote korporasies wat aan hulle behoort of waarmee hulle sake gedoen het, was die Heinaste in bewaring van die polisie.Hulle is die voormalige minister van visserye en mariene hulpbronne, mnr. Bernhard Esau, sy skoonseun, mnr. Tamson (Fitty) Hatuikulipi, die voormalige minister van justisie, mnr. Sacky Shanghala en sy vriend en sakevennoot, mnr. James Hatuikulipi (’n neef van Fitty) asook mnr. Pius Mwatelulo.Verder sê sy, moet Namibiërs besef hoewel die vaartuig verkoop is, kan Samherji nie sy hande op die geld lê nie.“Die rekening waarin die geld oorbetaal is, maak deel uit van die beslaglegging ingevolge die tussentydse Poca-bevel,” sê Imalwa.Intussen het die drie plaaslike vismaatskappye wat ‘n mindersheidsaandeel in die Heinaste besit het, in ‘n brief aan me. Annely Haiphene, uitvoerende direkteur van vissery en mariene hulpbronne, beswaar gemaak dat dit sonder hulle medewete geskied het.Sinco Fishing, Epango Fishing en Yukor Fishing, wat 42% van die aandele in die Heinaste besit het, sê die verkoop daarvan is sonder die insette van die plaaslike direkteure onderhandel. Hulle sê dit het geskied “met die doelbewuste voorneme om die minderheidsaandeelhouers te benadeel” end at hulle besig is om ‘n hofaansoek daarteen voor te berei.Samherji se Namibiese beleggingsmaatskappy Tidle Wave Investments Ninety Two het in 2013 ’n lening by die Sipriaanse maatskappy, Heinaste Investment, gekry om die boot te koop.Samherji se Esja Fishing het 58% van die aandele in dié beleggingsmaatskappy besit, terwyl die voorgenoemde drie vismaatskappye elk oor 13,5% se aandele beskik het.Imalwa het verduidelik die Heinaste het sedert die beslaglegging daarvan in die Walvisbaaise hawe op anker gelê. “Die ingenieurs aan boord wat na die enjins moes omsien, moes steeds betaal word.”Sy verduidelik daarom was dit beter om van die vaartuig afstand te doen en op die geld wat daarvoor betaal is, beslag te lê.Imalwa sê dit is die taak van kurators wat deur die hof aangestel is om die groot hoeveelheid vaste en roerende bates in bewaring te hou tot die strafregtelike verhoor eendag afgehandig is, om dit in die beste belang van die partye te bestuur. Hulle is die bate-administrateurs, mnre. Ian McLaren en David Bruni.Dié partye is die staat, aan wie die bates verbeurd verklaar sal word indien hulle skuldig bevind word, maar ook die beskuldiges en die betrokke maatskappye en beslote korporasies, sê Imalwa.Sy wys daarop hierdie bates het net betrekking op klagte wat spruit uit die beweerde korrupsie in die toekenning van maasbankerkwotas aan die maatskappy Namgomar Pesca Namibia.Imalwa sê dit is net een been van die staat se saak. Die ander hou verband met die toekenning van kwotas deur die staat se vismaatskappy, National Fishiong Corporation of Namibia (Fishcor). Op ’n vraag op nog Poca-aansoeke vir batebeslaglegging kan volg, het sy gesê sy wil nie die saak voortuit loop nie. -ronelle@republikein.com.na

Imalwa verduidelik Heinaste-transaksie

Kommentaar

Republikein 2025-12-17

Meld asseblief aan om kommentaar te lewer

Imalwa verduidelik Heinaste-transaksie

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.