Die rassekaart hoort nie in die politiek

JURIE VILJOEN SKRYF:

Haatveldtogte word nou al tot deur presidente gebruik vir politieke gewin.

Dit is absoluut ‘n skande dat Namibië ook nie agter gebly het nie en dat die president, dalk by gebrek aan iets anders om te sê, die rassekaart gespeel het by die afskop van Swapo se verkiesingsveldtog nie. "Swapo sal nie vergeet wat die blankes gesê het ten spyte van die feit dat Swapo vir 30 jaar goed was vir hulle nie." Waar is dit gesê en wanneer? Regstellende aksie en al die ander maatreëls is nie vir die regering ‘n probleemarea nie.

Almal het verwag dat die rassehaat in die VSA en SA nie na Namibië sal oorwaai nie. Maar die regering gebruik dit om krag aan hulle veldtog te gee.

Ons gebruik altyd ons goeie menseverhoudinge as voorbeeld as ons met ons mense in SA praat. Dit lyk egter of dit onvanpas is.

As daar geen rassekwessie in die wêreld was nie, sou Suidelike Afrika ‘n aardse utopia wees. Alles wat die afdraende kurwe gevat het, sal weer opgaan. Nou word hierdie land leeg gesteel en die skuldiges sal skotvry verklaar word.

Ja, ek hoop die GIPF-miljoene wat gesteel is en die Fishrot-sage sal sy tol nog in hierdie bestel eis.

Ek wil tog vra dat die regering nie die "wit gevaarte" verder gebruik nie omdat dit ook ‘n veralgemening is. By watter geleentheid het die wittes oorlog teen Swapo verklaar? Ek dog ons is nie swart en wit nie; almal Namibiërs.

Ons vergaderings, wat oor kultuur gaan, is vir almal oop; word in ons moedertaal gehou en daar word nie eers na ‘n politieke party verwys nie. Mense besluit vir hulself en maak nie enige politieke party met leuens van openbare platforms af sleg nie.