Die lewe is 'n leerskool

|AWEBAHE JOHANNES ||HOESEB SKRYF:'n Baie opvoedkundige ondervinding rakende opbouende lewensbeginsels wat 'n mens kan handhaaf, het my te beurt geval terwyl ek in 'n ry gestaan en 'n boek gelees het om tyd te verwyl.Ek wou nie die gesprek tussen die twee mense wat agter my in die ry gestaan het afluister nie, maar kon dit nie verhelp dat my ore ongevraagd gevoed is met die wysheid wat my denke opgekikker het nie.“Dit het niks met my uit te waai nie. Ieder en elk van ons het 'n dingetjie of twee wat ons liefs nie wil hê ander moet van weet nie. Ek wil glad nie oor ander mense se doen en late my mond uitspoel nie, want ek wil nie my hart met negatiwiteit besoedel nie. Laat my asseblief toe om myself te weerhou van aandadigheid aan karakterskending. Ek wil nie deel wees van gesprekke waarin 'n medemens se beeld met valshede afgekraak word nie.”Dit was nou nie woord vir woord die presiese weergawe van wat geuiter is nie. Ek het neerhalende opmerkings, die kragwoorde en krutaal liefs uitgelaat.Baie kere raak ons betrokke in gesprekke waarin sappighede oor ons medemense uitgedeel word. Telkemale is ons bangbroekerige bloedverwante, vriende of kollegas wat dit vermy om vir diegene wat beskinder word in die bresse te tree deur bloot die kaf van die koring in die gesprek te skei. Ja, by tye is ons te lojaal teenoor die kwaadstokende naamskender en word meegesleur deur die stroom van suinig wees met die waarheid.Hierdie lafhartigheid maak ons willens en wetens medepligtig daaraan om ons naastes se naam en aansien te beswadder. Ons raak deel van 'n bose skinderkring.Dit staan geskrywe in Spreuke 25:23 dat die noordewind 'n reënbui voortbring, maar dat 'n agterafpratery twis tussen mense veroorsaak. Kortom gestel: om 'n valse getuienis oor jou medemens te lewer en om deelagtig te wees aan slinkse gesprekke is nie goeie gewoontes nie.Dit is 'n mens van lae inbors en swak morele waardes wat uit vrye wil en keuse deelneem aan die bose kringloop van skindergesprekke waarin kwaad gepraat word oor andere. 'n Mens wat die beeld van 'n medemens in die openbaar in skindergesprekke of op skrif afkraak met valse aantygings, of aannames, beeld ook 'n lae selfbeeld uit.Die lewensles wat ek geleer het uit die wyse woorde wat daardie persoon wat agter my in die ry gestaan het geuiter het, is dat ek enige deelname aan skindergesprekke waarin valse aannames of beeldafkrakende aantygings die hoogty vier liefs moet vermy.Die lewensbeginsel wat ek moet handhaaf is om diegene wat in my teenwoordigheid valshede kwytraak oor andere tereg te wys, en die onwaarhede wat kwytgeraak word, ongedaan te maak.Ek wil daardie persoon hartlik bedank vir die gratis lewensles wat onbewustelik vir my aangebied is, want ek het besluit om dieselfde beginsel te handhaaf deur diegene wat in my teenwoordigheid andere wil beswadder daarop te wys dat ek glad nie te vinde daarvoor is om myself uit te laat oor andere se doen en late wat niks met my uit te waai het nie.Die leuse is: “Control your tongue by thinking what you want, but saying only what is appropriate”, asook: “Think it, don't say it”, en: “Think it, but don't write it”.Moenie u lae selfbeeld uitstal weens die haat en nyd wat u teenoor ander koester nie.

Die lewe is 'n leerskool

Kommentaar

Republikein 2025-07-18

Meld asseblief aan om kommentaar te lewer

Die lewe is 'n leerskool

Kommentaar

Republikein 2025-07-18

Meld asseblief aan om kommentaar te lewer

MELD AAN

Advertensie