Nampo laat die rekords spat

Die 57ste Nampo Oesdag, aangebied deur Graan SA van 13 tot 16 Mei by Nampo-park buite Bothaville in die Vrystaat, het die rekords laat spat met 87 191 besoekers, 377 vliegtuie en 69 helikopters oor die vier dae. Dis weer eens ’n bewys Nampo is die grootste en mees invloedryke handelskou vir die graansektor, die breër landbouwaardeketting en ’n kritieke betrokkenheidsplatform om oplossings en besprekings vir die landboubedryf te ondersoek.Die Agri Monitor-span van vier het met die ondersteuning van Pick n Pay en Agra die langpad na Nampo-park aangepak in die gemak van ’n Toyota Quantum Crew Cab-bussie van Pupkewitz Toyota. Brandstof vir die bussie en padkos vir die honger mae is by Go Agra op Mariental en Keetmanshoop opgevul. Die span was uitgevat in klere van Agra Safari Den en eg Namibiese velskoene, ander leerprodukte van Shilongo Leather Works en natuurlik ’n Namibiese vlag wat ons hoog laat wapper het. Agri Monitor en talle Namibiërs is met ope arms verwelkom met Namibiese boere wat bevestig het dat hulle daar is om kontakte op te bou en die jongste landboutegnologie te besigtig. Die meer as 900 uitstallers gebruik Nampo as ’n platform om nuwe en innoverende produkte vir die landboubedryf bekend te stel.POLITIEKE HOëLUI Nampo 2025 sal ongetwyfeld onthou word vir die ongekende politieke aandag wat dit ontvang het met ’n besoek van die Suid-Afrikaanse president, Cyril Ramaphosa, sy adjunk, Paul Mashatile, en verskeie ministers onder wie die landbouminister, John Steenhuisen, en Dean Macpherson van openbare werke en infrastruktuur.Ramaphosa het die geleentheid in sy persoonlike hoedanigheid as produsent bygewoon om sake te doen en met uitstallers oor die jongste landboutegnologieë te gesels. Die amptelike regeringsafvaardiging, onder leiding van Mashatile, het egter om ’n meer strategiese rede opslae gemaak: ’n Hernieude nasionale dialoog oor landbou se sentrale rol in die ekonomie.“Die skou was ’n reusesukses en die algemene gevoel onder produsente was optimisties. Die sterk teenwoordigheid van jongmense versterk ook dat landbou ’n toekoms het,” het Danie Minnaar, die voorsitter van Graan SA se Oesdagkomitee, gesê.“Daar is geen twyfel dat die Oesdag betekenisvolle sakebetrokkenheid regoor die waardeketting moontlik gemaak het nie,” het dr. Dirk Strydom, die besturende direkteur van Nampo, gesê.“Nampo is nie net Graan SA se vlagskipgeleentheid nie, dis ’n ruimte vir praktiese betrokkenheid, wat deur die behoeftes van produsente gedryf word,” het Richard Krige, die voorsitter van Graan SA, gesê. “Nampo se doel bly duidelik: dis ’n neutrale, apolitieke platform wat kennisdeling, vernuwing en kritiese dialoog moontlik maak om die hele sektor te bevorder – van grond tot silo.”GESPREKKEGesprekke is die hartklop van Nampo en het plaasgevind tussen produsente wat kultivars vergelyk, navorsers wat proefresultate verduidelik en diensverskaffers wat die jongste tegnologie demonstreer wat ontwerp is om opbrengste en volhoubaarheid te verbeter. “Wat Nampo onvervangbaar maak, is die geluid van produsente wat oor oesmasjienspesifikasies debatteer of notas oor insetkostestrategieë uitruil. “Nampo is waar produsente strategieë bespreek om toegang tot die beste saadtegnologieë te hê, waar hulle stropermodelle inspekteer en waar oplossings vir insetkostestygings, infrastruktuurbottelnekke en nuwe tegnologie gesoek word,” het dr. Tobias Doyer, die uitvoerende hoof van Graan SA, gesê.Vanjaar se tema was, “Globale Landbou, Plaaslik!” en meer as 900 uitstallers en produsente het interaksie gehad oor presisietegnologie, masjinerie-demonstrasies, vee-uitstallings en akkerbou-sentrums, 4x4-bane en gesinsvriendelike ervarings, ’n vroueprogram, die Engen Trekkermuseum, Graan SA Museum en Boereplanne-sones.“Alhoewel ons geëerd was om verskeie politieke leiers te ontvang, bly dit van kritieke belang om te onthou dat Nampo eerstens bestaan as Suid-Afrika se toonaangewende graanproduksie- en waardekettingekspo. “Die werklike impak van die week lê in die besprekings wat plaasgevind het rondom gewasprestasie, insetkoste, infrastruktuurbottelnekke en toegang tot nuwe tegnologieë,” het Doyer Nampo se kerndoelwit bevestig. NAMPO 2026Volgende jaar sien boere mekaar weer op 12 tot 15 Mei 2026 op Nampo-parkAgri Monitor het ’n kompetisie aangebied om te raai hoeveel windpompe die span tussen Windhoek en Nampo-park getel het. Etienne Groenewald is die wenner met sy perfekte raaiskoot van 126 windpompe en daarmee wen hy vyf jaar se lidmaatskap van Enjoy Travel en ’n Explorer-koopbewys ter waarde van N$1 000. – Graan SA– francoise@nmh.com.na

Nampo laat die rekords spat

Kommentaar

Republikein 2026-03-19

Meld asseblief aan om kommentaar te lewer

Nampo laat die rekords spat

Kommentaar

Republikein 2026-03-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.