Wentzel vas vir Delia se moord

Mariud Ngula - Die man wat daarvan verdink word dat hy ‘n 40-jarige vrou in haar woonstel vermoor, haar lyk in ‘n kombers toegedraai en daarna met haar voertuig op vlug geslaan het, is ná ‘n reuse soektog uiteindelik Dinsdag in Windhoek vasgetrek. Wentzel Maasdorp is gesoek vir die moord op Delia Weimers-Maasdorp wat na bewering sy meisie was en wie se dood skokgolwe deur die land gestuur het wat deur gevalle van geslagsgeweld geteister word. Weimers-Maasdorp se dood is deur vriende en kollegas beskryf as “bitter hartseer”, “absoluut verwoestend” en die “seerste nuus ooit”. Sy is herhaaldelik beskryf as ‘n “stunning mens” wat ‘n impak gemaak het op almal wat sy ken. Die woordvoerder van die Namibiese polisie, adjunkkommissaris, Kauna Shikwambi, het Maasdorp se arrestasie Dinsdag bevestig en gesê die polisie het hom by TripleJ onderskep waar hy ‘n geleentheid Rehoboth toe gesoek het. Hy is aanvanklik in die vroeë oggendure in Rundu opgemerk waar hy na bewering Weimers-Maasdorp se silwer BMW gelos het, voordat hy van die toneel gevlug het. Volgens adjunkkommissaris Bonifatius Kanyetu, koördineerder van misdaadondersoeke in Kavango-Oos, sê die polisie is deur individue in kennis gestel dat hulle Maasdorp, die neef van Weimers se eksman, gesien het waar hy die voertuig by die Wimpy-diensstasie op Rundu parkeer het. Maasdorp is volgens bronne Donderdag gesien waar hy die voertuig bestuur het. Hy het na bewering ‘n terugslag in sy dwelmverslawing gehad en is glo Vrydag by sy handelaar se huis gesien. Volgens Shikwambi het die polisie deur forensiese ontleding bevestig dat Maasdorp die verdagte in die moord van Weimers-Maasdorp is. Shikwambi sê van die items ingesluit haar selfoon wat as vermis aangemeld is, is teruggevind. “Die Samsung TV en iPhone wat aan Weimers-Maasdorp behoort het, is teruggevind. Die items is na bewering deur Maasdorp verkoop,” het Shikwambi gesê. Weimers-Maasdorp se liggaam wat toegedraai en vasgebind was, is Sondag in ‘n woonstel in Klein-Windhoek gevind. Volgens die polisie is sy deur vriende ontdek wat sedert Saterdag na haar op soek was. - republikein@republikein.com.na

Wentzel vas vir Delia se moord

Kommentaar

Republikein 2025-06-17

Meld asseblief aan om kommentaar te lewer

Wentzel vas vir Delia se moord

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie