Vier renosters in Hardap gestroop

’n Beloning van N$1 miljoen word aangebied vir inligting wat sal lei tot die inhegtenisneming en skuldigbevinding van lede van ’n sindikaat wat betrokke was by die onlangse stropery van vier renosters op ’n plaas naby Maltahöhe in die Hardapstreek.’n Beloning van N$200 000 is ook aangebied vir inligting wat sal lei tot die inhegtenisneming en skuldigbevinding van die stropers wat onlangs ’n witrenosterkoei gestroop het, asook nóg drie karkasse wat vandeesweek op die plaas ontdek is.Volgens die plaaseienaar, wie se naam nie vir veiligheidsdoeleindes genoem word nie, is twee renosterkoeie (twee susters van die koei wat onlangs gestroop is) en ’n bulkalf Maandag gevind.Al vier die renosters wat afgemaai is se horings is deur die stropers verwyder.Hy vermoed die stroperyvoorvalle het op dieselfde dag plaasgevind toe ’n witrenosterkoei op die plaas gestroop is, wat haar kalf, Elsa, wees gelaat het. Die karkas is sowat twee weke gelede ontdek toe die gesin vir die naweek weg was. Toe is ’n beloning van N$160 000 aangebied.“Ons is baie hartseer om soveel renosters op een slag te moes verloor, veral omdat dit Elsa se familie was,” het die eienaar aan Network Media Hub (NMH) gesê. Hy het egter gesê hulle is dankbaar dat Elsa oorleef het en so goed doen.Die eienaar het renostereienaars en ander bedank wat die beloning ondersteun het. Hy het gesê Elsa het ’n groot rol hierin gespeel.Intussen het Jaco Muller van HornNamibia ook ’n beroep op die publiek gedoen om hul ondersteuning met die ondersoek te gee. Die ministerie van die omgewing, bosbou en toerisme het die stropery van die vier renosters bevestig en gesê dit bring die totale aantal gestroopte renosters vir vanjaar op 18 te staan.In Februarie het NMH berig dat Namibië verlede jaar een van sy ergste jare vir renosterstropery in meer as ’n dekade beleef het, met 81 renosters wat gestroop is. Owerhede het 77 verdagtes in hegtenis geneem in verband met renosterverwante misdade, waarvan 73 Namibiese burgers was.Amptenare het bevestig dat die land se stroperykrisis ’n hoogtepunt in 2015 bereik het, toe 97 renosters vir hul horings afgemaai is. Dit is gevolg deur 84 gevalle in 2018 en 94 in 2022.Vir enige inligting, kontak adjunkkommissaris Barry de Klerk by 081 129 0054 of adjudantoffisier Frieda Hangala by 081 377 1707 van die Blue Rhino-taakspan van die Namibiese polisie. Gebruik slegs hierdie nommers om te verseker dat inligting vertroulik bly en die identiteit van hokaairoepers beskerm word.– ellanie@nmh-hub.com.na

Vier renosters in Hardap gestroop

Kommentaar

Republikein 2025-11-03

Meld asseblief aan om kommentaar te lewer

Vier renosters in Hardap gestroop

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.