Veediefstal in Erongo styg met 21%

Veediefstal in die Erongostreek het met 21% tussen 2024 en 2025 met 21% gestyg, met die aantal stuks grootvee wat as gesteel aangemeld is wat van 122 tot 167 toegeneem het.Dié syfers is Vrydag deur Erongo se streekbevelvoerder, komm. Nikolaus Kupembona, tydens ’n vergadering met boere op Omaruru bekend gemaak. Volgens hom is 122 stuks grootvee, wat buiten beeste ook perde en donkies ingesluit het, in 2024 gesteel en is net 36 teruggevind. Die polisie het 137 voorvalle geregistreer en 32 verdagtes in hegtenis geneem. Die totale waarde van die gesteelde vee, insluitend kleinvee soos bokke, skape en varke, was ongeveer N$1,3 miljoen, terwyl die waarde van vee wat teruggevind is, op N$418 900 beraam is.Verlede jaar het die aantal stuks grootvee wat gesteel is tot 167 gestyg, met 44 diere wat teruggevind is. Die diefstal van 277 stuks kleinvee is by die polisie aangemeld, met 56 wat teruggevind is. Volgens Kupembona is 167 sake geregistreer en 41 verdagtes in hegtenis geneem. Die waarde van die gesteelde diere was sowat N$2,6 miljoen, terwyl die wat weer gevind is, op N$78 000 beraam is. In Januarie vanjaar sê hy is 40 stuks kleinvee gesteel, tien sake is geregistreer en vier verdagtes is in hegtenis geneem. Die beraamde waarde beloop N$84 350.“Volgens ons vergelyking met die statistieke van die twee jaar, kan ons ’n toename in voorvalle van veediefstal sien wat regtig kommerwekkend is,” het Kupembona gesê.Hy het dié misdaadtendens aan ’n vraag in gemeenskappe na gesteelde vleis verbind. “Die misdadigers word net gemotiveer deur die gemeenskap wat hulle ondersteun en die gesteelde vleis koop,” het Kupembona gesê.Hy het plaasmisdaad as ’n kommer tot veiligheid in die streek beskryf. “Boerdery is nie net ’n besigheid nie, maar ook ’n lewenswyse wat ons nasie voed. Wanneer jou lewende hawe deur misdadigers gesteel word, jou toerusting gevandaliseer word of jou eiendom betree word, is dit ’n aanval op die veiligheid van die hele streek,” het Kupembona gesê.Volgens hom beskou die polisie veiligheid op plase as ’n prioriteit, maar kan die polisie nie alleen afgeleë gebiede dek nie. “Ek sal eerlik met julle wees dat die polisie nie orals kan wees nie en ons kan nie enige misdaad, insluitend veediefstal, alleen beveg nie.” Kupembona het ’n beroep gedoen vir vinniger optrede, groter teenwoordigheid van die polisie en die vroeë aanmelding van voorvalle aan die kant van boere.Hy het ook ’n beroep op boere gedoen om die “oë en ore” te wees, sekuriteit op plase deur middel van kringtelevisie en ligte te versterk, buurtwagte vir plase te organiseer en kommunikasie deur middel van radio- of WhatsApp-stelsels te verbeter. Kupembona het ook gewaarsku dat interne risiko’s op plase bestaan en daar nie bloot aangeneem moet word dat alle werkers vertrou kan word nie. Hy het boere gevolglik aangemoedig om die nodige toesig en voldoende sifting in hierdie verband toe te pas.Die kommissaris het die trae aanmelding van voorvalle asook lewende hawe wat nie gebrandmerk is nie, gekritiseer en gesê dit verswak ondersoeke en vervolgings. Hy het gevra vir groter samewerking tussen bure en gesê patrollies en bewusmaking van misdaadvoorkoming gaan verhoog word. “Mannekrag gaan altyd ’n uitdaging wees, maar ek wil dit nie as ’n verskoning gebruik nie,” het hy gesê.Boere wat tydens die vergadering teenwoordig was, het egter die polisie vir antwoorde gedruk oor of dit tot konkrete uitkomste sal lei. Markus Trede van die Omaruru Boerevereniging het verwys na ’n soortgelyke vergadering wat sowat drie jaar gelede gehou is. Volgens hom het boere sedertdien patrollies en private veiligheidsmaatreëls opgeskerp, omdat hulle verstaan dat die polisie se kapasiteit beperk is. Sy vraag was watter lesse het die polisie uit daardie vergadering geleer en watter optrede het hieruit gevolg. “Ek het ’n klomp stemme gehoor wat gesê het in nog ’n vergadering gaan niks gebeur nie,” het Trede gesê.Hy het voorvalle beskryf wat volgens hom swak implementering en trae reaksie weerspieël het. In een voorval is bewyse wat met ’n verdagte verbind is nie opgevolg nie en in ’n ander voorval het boere die verdagtes tot by ’n nedersetting gevolg, maar die polisie het laat en swak toegerus opgedaag. Trede wou weet of senior beamptes oop dossiere evalueer, watter maatreëls in plek is om vinnige optrede tydens aktiewe agtervolgings te verseker, asook hoe die polisie beoog om vertroue te herstel en “swak skakels” binne die polisiemag te verwyder.Kupembona het die bogenoemde voorvalle as “ongelukkig” beskryf en gesê besonderhede sal na afloop van die vergadering opgevolg word. Hy het ’n beroep op boere gedoen om nie vertragings te aanvaar wanneer voorvalle besig is om te ontvou nie. “Daar is nie ’n môre nie, môre is dit te laat,” het hy gesê en boere aangemoedig om hul kommer met stasiebevelvoerders of sy kantoor te deel. Hy het bewerings verwerp dat gekonfiskeerde vleis deur beamptes gebruik is, met prosedures in plek wat bepaal hoe bewysstukke terugbesorg of daarvan ontslae geraak is. Martin Herman, ’n bewaarder by die ministerie van die omgewing, bosbou en toerisme, het op sy beurt erken voorvalle van veediefstal het toegeneem en dat koördinering tussen die ministerie en boere moet verbeter. Die Omaruru-boer Vehaka Tjimune het kommer uitgespreek oor munisipale kampe naby plase wat nedersettings vir plakkers word en wat met stropery en diefstal verbind word. Hy wou ook weet waarom gemeenskappe nie onwettige vleisverkope aanmeld nie. “Die gemeenskap weet waar om te eet en te gaan en hierdie vleis te vind wat gestroop word. Maar die gemeenskap is stil,” het Tjimune gesê.Hy het die gebruik van hommeltuie en kameras op paaie voorgestel om opsporing te verbeter, terwyl hy ook die uitdagings met betrekking tot koste en monitering erken het.Kupembona het gemeenskappe aangespoor om nie gesteelde vleis te koop nie, en gesê die vraag laat misdadigers toe om vinnig te beweeg en binne ure van gesteelde vee ontslae te raak.– adam@erongo.com.na

Veediefstal in Erongo styg met 21%

Kommentaar

Republikein 2026-03-26

Meld asseblief aan om kommentaar te lewer

Veediefstal in Erongo styg met 21%

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.