Tjihero’s bly in aanhouding

Die welbekende boer en stoetteler mnr. Albert Tjihero (65), sy seun Kevin (30) en vier ander verdagtes wat van veediefstal verdink word, kon nie die afgelope Dinsdag daarin slaag om op borgtog vrygelaat te word nie. Die Namibiese polisie se adj. komm. Katrina Andreas in die Otjozondjupastreek het bevestig die verdagtes het Dinsdag in die landdroshof op Okahandja verskyn, en in aanhouding bly. “Borgtog is nie aan hulle toegestaan nie,” het Andreas aan Republikein gesê.Die Tjihero’s en nog vier ander se inhegtenisname Vrydagaand vir beweerde veediefstal, het skokgolwe deur die Namibiese landbougemeenskap gestuur. Volgens die polisie het die Tjihero’s, tesame met die verdagtes mnre. Joel Katjivi (35), Ruben Ndatowela (33), Katunahange Karitjindua (22) en Jeremia Herau (45) glo vier kalwers ter waarde van N$52 000 gesteel. Die voorval het op die plaas Okorusengo in die Hochfeld-omgewing plaasgevind en die kalwers behoort aan mnr. Ockert Steyn. Steyn huur glo weiding by Tjihero. Steyn wou Dinsdag nie kommentaar oor die voorval lewer nie. “Ek gaan nou eers niks sê nie, ek kry honderde oproepe. “Ek is regtig op breekpunt, aan die een kant druk een klomp mense my en aan die ander kant weer ander – dis ‘n enorme groot storie. Ek wil eers niks verder sê nie, ek sal later praat,” het hy gesê.Die Hochfeld-polisie het Vrydagaand, in samewerking met die Okondjatu-polisiekantoor, op die vee beslag gelê terwyl die verdagtes glo op pad na die Dankbaar-veiling was. Hulle het ook op die voertuig en sleepwa beslag gelê wat gebruik is om die vee te vervoer – ‘n Toyota Legend 45-dubbelkajuitbakkie en ‘n sleepwa met ‘n Okahandja-registrasiemerk. Die Tjihero’s is eienaars van beide die Okorusengo Brahman- asook die Okorusengo Simmentaler-stoet en het reeds verskeie pryse vir hul pragdiere by die land se skoue verower – van so ver as Okakarara tot in Windhoek. – republikein@republikein.com.na

Tjihero’s bly in aanhouding

Kommentaar

Republikein 2025-05-08

Meld asseblief aan om kommentaar te lewer

Tjihero’s bly in aanhouding

Kommentaar

Republikein 2025-05-08

Meld asseblief aan om kommentaar te lewer

MELD AAN

Advertensie