Swartrenosterbul gestroop

Die derde karkas van 'n renoster is in die Omaruru-distrik in die Erongostreek in die afgelope maand ontdek.

'n Swartrenosterbul se ontbinde karkas met sy horings verwyder is onlangs op 'n plaas gevind wat onder bewaarderskap van swartrenosters is.

Volgens senior inspekteur Judith Shomongula van die Namibiese polisie in Erongo word 'n saak van die onwettige jag van 'n spesiaal beskermde wildspesie en diefstal van renosterhorings ondersoek.

Die polisie het gesê die voorval het iewers tussen Desember 2024 en 16 Oktober 2025 plaasgevind. Die vermeende stropers het na bewering die plaas betree, die renosterbul met 'n onbekende vuurwapen in die kop geskiet en sy horings met 'n skerp voorwerp verwyder.

Niemand is nog in hegtenis geneem nie en ondersoeke duur voort.

Dit volg op twee vorige gevalle van stropery wat verlede maand op 'n plaas in die Omaruru-distrik aangemeld is waar die karkasse van 'n swartrenoster- en witrenosterkoei tussen 3 en 11 Oktober ontdek is, ook met hul horings verwyder. Beide karkasse is met ballistiese bewyse op die toneel gevind, maar geen verdagtes is nog aangekeer nie.

– [email protected]