Spencer steeds gesoek

Klein Spencer Mandela Nakale het op driejarige ouderdom op 28 Desember 2020 op Lüderitz vermis geraak en is sedertdien nog nie gevind nie.“My seuntjie het op 8 Februarie 2025 agt jaar oud geword en ons sou sy kroonverjaardag gevier het,” sê Julia Ndafyaalako, Spencer se ma. Sy is vasbeslote sy kan of sal nooit ophou hoop dat haar seuntjie gevind sal word nie. “Dis ’n baie traumatiese ervaring. My seuntjie word nou al vir meer as vier jaar vermis. Die pyn en hartseer is ondraaglik. “Ons weet nie waarheen om te gaan en wat om te doen nie. Ek sukkel met soveel vrae, wat gebeur het en wat verkeerd kon geloop het. Net antwoorde sal vir my ’n mate van vrede bring.”Sy het ’n beroep op enigiemand met inligting gedoen om na vore te kom. “Dis die enigste manier en die regte ding om te doen.”Spencer het destyds saam met sy ma van die Ongha-nedersetting in die Noorde gereis om vir die feestyd by sy pa, Nelson Nakale, op Lüderitz te gaan kuier. “Ons het vir 10 dae gebly en toe het my seuntjie op geheimsinnige wyse verdwyn terwyl hy in Area Sewe was. Sedertdien het die polisie geen leidrade gekry nie.”Die kleuter het ’n rooi T-hemp, blou broek en sandale aangehad die dag toe hy vermis geraak het.Die polisie het ’n soektog vanaf die rotsagtige kuslyn noord van Lüderitz tot by Airoplanestrand van stapel gestuur nadat Spencer verdwyn het. “Spencer het op 27 Desember saam met ’n familielid gegaan om by Area Sewe te oornag. Die volgende dag het die familielid werk toe gegaan en toe sy terugkom, het sy vir my en Julia meegedeel dat kinders na my seuntjie soek. “Ons het by die soektog aangesluit en het toe na die polisie gegaan,” vertel Nelson.HARTSEERVir Nelson is dit onmoontlik om van sy vermiste seun te vergeet. “My hart is stukkend. Hoe kan ’n mens spoorloos verdwyn? Elke dag is ’n stryd, want hy is my bloed en my kind. Ek dink altyd aan waar hy kan wees en wonder oor hom.”Nelson sê hy dink heeltyd aan sy seuntjie en wonder hoe dinge sou wees. “Ek sou hom geleer het hoe om fiets te ry en ’n man te wees. Ek weet in my hart dat hy nog lewe en ek hoop waar hy ook al is, dat hy gesond is sodat ons weer kan herenig, want dit is nie maklik nie. Ek wens dit vir niemand toe nie.”Hy het gesê dat mense ná al die tyd dalk dink dis nie nodig om met inligting oor die voorval na vore te kom nie. “Ek weet my seuntjie leef. Lüderitz is ’n klein dorp en ek doen ’n beroep op enigiemand met inligting om na vore te kom sodat ons hierdie saak kan afhandel of sodat ons ons seun kan kry, want ons sal nie vrede vind voordat die seun met ons herenig is nie.”Nelson volg die ontvoering- en mensehandelverhoor van Joshlin Smith in Saldanha in die Wes-Kaap met belangstelling. “Dit laat my dink aan my vermiste seun. Die Wasserfall-gesin [van wyle Shanon Wasserfall] in Walvisbaai het afsluiting gekry en dit is wat ons ook wil hê.” Hy het weer eens ’n beroep op die publiek gedoen om met inligting te help. “Daar is ’n beloning van N$50 000. Die saak is na Keetmanshoop oorgeplaas en ek wil graag hê die polisie moet die ondersoek opskerp, wat blykbaar koud word.”In reaksie op navrae het ||Kharas se koördineerder vir misdaadondersoeke, adjunkkommissaris Nicodemus Mbango, bevestig dat die inspekteur-generaal van die Namibiese polisie, luitenant-generaal Joseph Shikongo, onlangs ’n opdatering oor die vordering van die saak versoek het.– otis@nmh-hub.com.na

Spencer steeds gesoek

Kommentaar

Republikein 2025-12-18

Meld asseblief aan om kommentaar te lewer

Spencer steeds gesoek

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.