‘Ons het drome vir hom gehad’

Desmarius Hansen en Rita Kakelo“Ons het planne vir hom gehad. Hy is met drome grootgemaak, drome wat ons vir hom gehad het.”Só sê die oom van die 11-jarige seun van Rehoboth wie se liggaam verlede Saterdag in die droë rivierbedding van die Oanob gevind is. Hy weet eintlik nie eers wat om te sê nie, het Richard Doëseb gister tydens ’n somber waak gesê op die toneel waar die 11-jarige Gephardt Doëseb se liggaam gevind is. Volgens Doëseb sukkel die familie om sy dood te verwerk. “Niemand van ons het verwag dat so iets sal gebeur nie,” het hy gesê.Familielede, lede van Rehoboth se gemeenskap asook dié graad 5-leerling se klasmaats en onderwysers van die Acacia Primêre Skool het die waak bygewoon op die plek waar hy Saterdag deur ’n groep meisies gevind is wat bokke in die rivier opgepas het.Gephardt het verdwyn terwyl hy van die skool af op pad huis toe was. Hy is as vermis aangemeld nadat hy Vrydag nie van die skool af teruggekeer het nie.Rodensia Doëses, Gephardt se ma, het onbeheersd tydens die somber waak gehuil.“Dit was my seun, my enigste kind, hoe kan enigiemand dit doen?” Volgens Doëses was sy onbewus van haar kêrel se beweerde betrokkenheid by haar seun se dood. Dickson Karomuine, met wie sy in ’n verhouding was, het enkele ure later op ’n aanklag van moord in die landdroshof op die dorp verskyn. Karomuine (33), staan tereg op drie aanklagte insluitend moord (gelees saam met die bepalings van die wet op gesinsgeweld), dwarsboming van die gereg en diefstal. Die staat beweer Karomuine het die 11-jarige Gephardt op 11 September vermoor deur hom met ’n mes aan die linkerkant van sy nek te steek en hom met ’n klip teen die kop te slaan. Sy saak is tot 26 November uitgestel vir verdere ondersoek en regsverteenwoordiging.“Ons almal wag vir die polisieondersoek om vir ons iets te sê,” het ’n hartseer Doëses gesê. Volgens sy oom is Gephardt se biologiese pa van sy dood in kennis gestel.“Hy is bewus daarvan, maar hy is op die plaas en kan nie vir die begrafnis hierheen kom nie. Hy is moeilik om te bereik.”Gerhardt se familie het hul dank teenoor die polisie en owerhede uitgespreek vir hul pogings in die ondersoek na sy dood en ook die arrestasie van ’n verdagte. “Ons wil die plaaslike owerhede bedank vir hul pogings om die man te vang wat dit gedoen het,” het Doëseb gesê.Volgens die polisie op Rehoboth vorm Karomuine se bewegings nadat Gephardt se liggaam ontdek is, deel van die ondersoek. “Hoekom het hy probeer weghardloop? Hoekom het hy ontsnap? Daar is dalk ’n rede en ons wil sy kant van die storie hoor,” het ’n polisiebeampte gesê.Vir nou plaas Gephardt se familie hul vertroue in die regstelsel.“Ek glo geregtigheid sal seëvier,” het ’n familielid gesê.Gephardt se dood glo aan die hand van iemand wat hy hom moontlik geken en wat deel van sy familiekring was, kom enkele dae nadat ’n nasionale biddag teen geslagsgeweld en moorde by die Onafhanklikheidstadion in Windhoek gehou is. Toe het president Netumbo Nandi-Ndaitwah gewaarsku gebed alleen gaan nie die land se pandemie van geslagsgeweld beëindig nie en dat “goddelike ingryping gepaard moet gaan met optrede en verantwoordbaarheid”. Volgens Nandi-Ndaitwah word die land deur “verskillende euwels” geteister. Die president wou weet waarom vooruitgang in die stryd teen geslagsgeweld “onbenullig” bly.Sy het verwys na die eerste nasionale biddag wat in 2014 deur die voormalige staatshoof, Hifikepunye Pohamba, gelei is en Namibiërs uitgedaag om 12 jaar later selfondersoek te doen oor wat hulle “nie reg” in die stryd teen geweld doen nie. – desmarius@nma.com.na– rita@nmh-hub.com.na

‘Ons het drome vir hom gehad’

Kommentaar

Republikein 2026-09-18

Meld asseblief aan om kommentaar te lewer

‘Ons het drome vir hom gehad’

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.