Namdia-sekuriteitsbestuurder vrygespreek oor diamantroof

Die geskorste sekuriteitsbestuurder van Namib Desert Diamonds (Namdia), Paulinus Sheyapo, is van alle aanklagte in ’n interne dissiplinêre verhoor oor die gewapende diamantrooftog van 18 Januarie 2025 vrygespreek.In ’n beslissing gedateer 20 Oktober het die voorsitter van die verhoor, Cor Beuke, bevind dat Namdia nie daarin geslaag het om Sheyapo se persoonlike verantwoordelikheid vir ernstige sekuriteitstekortkominge te bewys nie.Sheyapo het vyf hoofaanklagte in die gesig gestaar wat verband hou met toegangsbeheer, fisiese en elektroniese sekuriteit, personeelbesetting en opleiding en werknemer-sifting. Die verhoorkomitee het hom op alle punte vrygespreek en bevind dat hy verbeterings geïnisieer het, bykomende beskermingsmaatreëls ingestel en goedkeuring gesoek het om sekuriteitsinfrastruktuur te moderniseer.Beuke het gesê die mislukking van sekuriteitsmaatreëls stel nie op sigself persoonlike wangedrag vas nie. Namdia het nie voldoende bewys gelewer van óf growwe óf gewone nalatigheid ingevolge die aanklagte nie.Die beslissing sit uiteen hoe langdurige sekuriteitswakhede die maatskappy kwesbaar gelaat het toe twee gewapende mans toegang tot Namdia perseel verkry het met die hulp van die voormalige sekuriteitswag Joel Angula.Die rowers het mense gyselaar geneem en diamante gesteel, terwyl die hoofsekuriteitsbeampte Francis Eiseb doodgeskiet is. Een van die vermeende rowers, Max Endjala, het volgens die Namibiese polisie aan ’n selftoegediende skietwond beswyk.MISLUKKINGS IN TOEGANGSBEHEERVolgens die rekonstruksie van gebeure het Angula omstreeks 13:18 op 18 Januarie by die perseel aangekom met twee mans wat in sy voertuig met getinte ruite versteek was. ’n Ondersoek het bevind dat die voertuig nie behoorlik deursoek is nie. Teen 14:07 het toesigbeeldmateriaal die twee indringers op die perseel gewys.Beuke het bevind dat ’n behoorlike deursoeking waarskynlik die mans sou ontbloot het. Alhoewel sekuriteitsreëls wat sulke kontroles vereis reeds in plek was, het Namdia nie bewys dat Sheyapo die verontagsaming daarvan geduld het of sy toesighoudende pligte geskend het nie.Die verhoor het ook tekortkominge in besoekersregistrasie bevind. Terwyl die gewapende indringers reeds op die perseel was, is drie mense wat groot sakke gedra het toegelaat nadat hulle na bewering gesê het hulle word verwag vir ’n televisie-onderhoud. Sommige inskrywings in die besoekersregister was onvolledig, hoewel die beslissing geen verband tussen hierdie besoekers en die rooftog vasgestel het nie.WAARSKUWINGS IN 2023’n Sekuriteitsinspeksie deur die Bank of Namibia (BoN) in Mei 2023 het na bewering talle tekortkominge in sekuriteitsprotokolle by Namdia geïdentifiseer, insluitend personeeltekorte, gebrekkige toegangsbeheer, onvoldoende toesig en probleme met die rugsteunkragtoevoer.In September daardie jaar het Sheyapo na bewering sekuriteitsopgraderings ter waarde van sowat N$5,7 miljoen voorgestel, insluitend bykomende beskermingsmaatreëls vir hoogs sensitiewe areas. Begrotingsbesnoeiings en langdurige verkrygingsprosesse het die implementering egter vertraag.Alhoewel die direksie vereis het dat die opgraderings teen 20 Desember 2024 voltooi moes wees, was die bykomende sekuriteitsinstallasies nie in werking ten tyde van die roof nie. Ondersoekers het bevind dat hoogs sensitiewe areas onvoldoende beskerm gebly het.Die sogenaamde rooi sone het slegs ’n sekuriteitsportaal van glas gehad, terwyl bykomende versterkte versperrings en meer vlakke van toegangsbeheer ontbreek het.Ondersoeke het getoon elektroniese toesig was ook kwesbaar. Omstreeks 18:58 op die dag van die roof het een van die indringers ’n elektriese boks genader. Die kameras en opnamestelsels was onmiddellik daarna buite werking, wat op inmenging met die kragtoevoer dui. Namdia kon egter nie bewys dat Sheyapo op ’n nalatige manier versuim het om die betrokke tegniese risiko’s aan te spreek nie.PERSONEELTEKORTEPersoneelbesetting en noodgereedheid het verdere probleme opgelewer. Eiseb het omstreeks 13:37 die perseel verlaat en eers om 17:04 teruggekeer, wat geen bykomende senior beampte beskikbaar gelaat het om toesig oor sekuriteitsmaatreëls tydens sy afwesigheid te hou nie.Namdia het reeds met beperkte sekuriteitspersoneel gefunksioneer. Werwing is op ys geplaas, terwyl die maatskappy ook probeer het om buitensporige oortyd te verminder. Noodprosedures is nie voldoende getoets nie.Die maatskappy het ook nie oor ’n funksionerende program beskik om bestaande werknemers gereeld te sif vir moontlike bedreigings binne die maatskappy nie. Die verhoor het egter geen bewys gevind dat sodanige sifting Angula se betrokkenheid sou ontbloot het nie.Namdia het destyds ’n interne ondersoek van stapel gestuur wat gelei het tot die tydelike skorsing van Sheyapo, die uitvoerende hoof Alisa Amupolo en die hoofbedryfsbestuurder Uahoroka Kauta.– ann-kathrin@nmh-hub.com.na

Namdia-sekuriteitsbestuurder vrygespreek oor diamantroof

Kommentaar

Republikein 2026-10-28

Meld asseblief aan om kommentaar te lewer

Namdia-sekuriteitsbestuurder vrygespreek oor diamantroof

Kommentaar

Republikein 2026-10-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.