'n Naweek van sterftes

Die misdaadverslag van die naweek word oorheers deur van moorde en noodlottige padongelukke tot wildmisdaad. 

’n Namibiese man (36) is in die Omusatistreek vir strafbare manslag, roekelose en/of nalatige bestuur en bestuur sonder ’n lisensie in hegtenis geneem ná ’n noodlottige ongeluk Vrydag omstreeks 01:00.

Volgens die polisie het die verdagte wat ’n wit Toyota Land Cruiser bestuur het, op die Outapi–Okalongo-pad ’n voetganger noodlottig getref. Valombola Victor Natangwe (34) is deur die verdagte se voertuig getref toe hy naby die Ouholondema-nedersetting die pad oorgesteek het en is op slag dood. Die verdagte is in aanhouding. 

Saterdag omstreeks 03:00 het ’n noodlottige kop-aan-kop-botsing naby die 

Okakongwena-nedersetting op die hoofpad tussen Eenhana en Okongo plaasgevind en die lewe van een persoon geëis. Die 39-jarige Ifo Paulus is in die botsing tussen ’n Toyota Hilux en ’n Ford Ranger dood. Die bestuurder van die Ford Ranger is in hegtenis geneem en die polisie se ondersoek duur voort. 

Op dieselfde dag omstreeks 20:00 is vier mense dood in ’n ongeluk op die C33-pad sowat 20 kilometer van Karibib en die rigting van Omaruru. 

Volgens die polisie het ’n vragmotor ’n U-draai in die pad gemaak, met ’n Nissan Sentra met ses insittendes wat teen die vragmotor gebots het. 

Twee mense het op die toneel gesterf, terwyl nog twee later aan hul beserings in die Omaruru-staatshospitaal beswyk het. Nog twee passasiers verkeer tans in ’n kritieke toestand.

Antonius Petrus Roos (37) is Sondag omstreeks 05:30 dood nadat hy sowat twee kilometer buite Karasburg deur ’n vragmotor getref is terwyl hy B3-pad oorgesteek het.

MOORD

Die liggaam van die tweejarige Namusha Lydia Ruusa is Vrydag omstreeks 07:50 in ’n landery by die Ohalumbele-nedersetting in die Onesi-kiesafdeling ontdek. 

Volgens die misdaadverslag het ’n verdagte die kamer binne gegaan waar drie minderjarige kinders van onderskeidelik twee-, tien- en 12-jaar saam met ’n siggestremde vrou geslaap het. Na bewering is die tweejarige uit die kamer geneem en in die landery met mahangu verwurg en haar liggaam hier gelaat. Volgens die polisie is ’n 31-jarige vrou as ’n persoon van belang in die kleuter se dood vir ondervraging aangehou. 

In die Kahenge-nedersetting in Kavango-Wes is Rosalia Andonyo (39) Vrydagnag met ’n onbekende voorwerp noodlottig aangerand. Volgens die polisie het die verdagte Andonyo se liggaam na nabygeleë bosse gesleep waar hy dit gelos het. Die polisie het ’n 22-jarige man vir ondervraging in hegtenis geneem.

POGING TOT MOORD, ROOF

Tydens ’n rusie Vrydag omstreeks 23:00 by die Kambwa Bar in Wanaheda, Windhoek, is ’n man deur die mond geskiet. Volgens die polisie is die slagoffer in ’n kritieke toestand na die hospitaal vervoer. Die verdagte is in hegtenis geneem en sy wapen gekonfiskeer. 

Op Oshakati is ’n saak van poging tot moord geopen, na ’n voorval Saterdag omstreeks 21:00 by GRN Shebeen in die Oshandumbala-nedersetting. ’n Man (40) is deur ’n 50-jarige man met ’n egsteel geslaan wat die slagoffer met ’n ernstige kopwond gelaat het. Die verdagte is nog nie in hegtenis geneem nie. 

Twee rooftogte is Vrydag tussen 10:00 en 11:00 in Otjomuise in Windhoek aangemeld. In een voorval het verdagtes na bewering met geweld twee iPhones en N$670 kontant met ’n waarde van N$24 260 gebuit. In die tweede voorval is ’n voertuig se ruit stukkend geslaan, en is ’n iPhone 17 ter waarde van N$39 550 gesteel. Niemand is nog in hegtenis geneem nie. 

DWELMS EN WILDMISDAAD

Die polisie het verskeie mense vir die besit van dwelms in hegtenis geneem. In Soweto in Windhoek is ’n 28-jarige man Vrydag in besit van 20 gram dagga ter waarde van N$1 000 betrap. Buite Windhoek by Aris-plaas is ’n 26-jarige man ook Vrydag in hegtenis geneem, nadat hy met 1 760 gram dagga ter waarde van N$17 000 betrap is.

Op Oshakati is ’n 55-jarige onderwyser Saterdag omstreeks 17:45 in hegtenis geneem, nadat hy na bewering aangebied het om twee olifanttande aan ’n geheime polisieman te verkoop. Die olifanttande is gekonfiskeer en die polisie se ondersoek duur voort. 

GEREGTELIKE ONDERSOEKE

Verskeie geregtelike ondersoeke is geopen, insluitend gevalle van vermoedelike selfdood op Okahao en Karibib, asook ’n verdrinking Saterdag in die Zambezirivier naby Katima Mulilo. Die polisie het lede van die publiek versoek om indien ’n familielid vermis word, die lykshuis by die Katima Mulilo-staatshospitaal te besoek om moontlik die oorledene te identifiseer. ’n Klag van veediefstal is op Oshakati ingedien, huisbraak op Brakwater en diefstal onder valse voorwendsels op Rehoboth waartydens N$51 460 elektronies na die verdagte oorgeplaas is. Op Stampriet is die diefstal van sonkragtoerusting ter waarde van N$18 000 aangemeld. Twee verdagtes is in hegtenis geneem en die items is teruggevind.

– [email protected]