Mesmoord-vrou bly agter tralies

’n Vrou van Windhoek wat aangekla word van die moord op haar swaer en poging tot moord op haar vervreemde man, bly tot en met haar volgende hofverskyning agter tralies.Die 46-jarige Andrea Helena Feris het gister haar eerste verskyning in die landdroshof in Katutura gemaak in verband met die gebeure wat die naweek by ’n huis op Elisenheim buite Windhoek plaasgevind het.Die staatsaanklaer Marlon Adams het borgtog teengestaan op grond daarvan dat Feris met die voortgesette polisieondersoek kan inmeng. Adams het ook die erns van die twee aanklagte teen Feris en openbare belang as redes aangehaal waarom borgtog geweier moet word. Feris het gister aangedui dat sy vir regshulp gaan aansoek doen. Sy moet weer op 4 Junie in die hof verskyn.Sy word daarvan beskuldig dat sy Sondag haar swaer, Abre Maasdorp, twee keer in die laer regterkant van sy maag en een keer in die regterkant van sy bors met ’n mes gesteek het. Maasdorp het op die toneel inmekaar gesak en is deur Stad Windhoek se nooddienste dood verklaar.Feris het ook die pa van haar 18-jarige dogter met ’n mes gesteek. Sy dogter het hom na die huis op Elisenheim ontbied, nadat Feris glo “onreëlmatig” opgetree het. Volgens die polisie se voorlopige ondersoek het die voorval, wat tot die dood van Feris se swaer en aanval op haar vervreemde gelei het, omstreeks 14:35 plaasgevind. Feris en haar man is besig om te skei. Volgens die polisieverslag het die egpaar se dogter, wat saam met Feris in Elisenheim woon, haar pa vroeër die dag gebel om te sê haar ma is besig om items in die huis te breek. Haar man is toe saam met Maasdorp (sy broer) na die huis.Die pa het die huis binnegegaan, terwyl Maasdorp buite in die voertuig gewag het. Volgens die dogter se weergawe aan die polisie het haar ma haar pa in die huis gekonfronteer en gesê hy gaan nie vir haar (die dogter) saam met hom vat nie. Feris het na bewering ’n mes gegryp en hom in die lae linkerkantse deel van sy rug gesteek.Feris se beseerde man het na buite gehardloop en Maasdorp se aandag getrek, wat hom te hulp gesnel het. Feris het Maasdorp na bewering twee keer in die laer regterkant van sy maag en een keer in die bors gesteek wat veroorsaak het dat hy inmekaar gesak het. Tydens die onderonsie het Feris se man, volgens die polisie, ’n klein botteltjie water na haar gegooi wat haar teen die voorkop getref het. Hul dogter het na die bure se huis gevlug.Nooddienste het Feris se vervreemde man na Mediclinic vervoer, met paramedici wat sy besering as matig beskryf het.Feris wat na bewering ’n geestesgesondheidspasiënt is, is deur noodpersoneel na die Katutura-staatshospitaal vervoer waar sy vir matige beserings behandel is. – rita@nmh-hub.com.na

Mesmoord-vrou bly agter tralies

Kommentaar

Republikein 2026-05-01

Meld asseblief aan om kommentaar te lewer

Mesmoord-vrou bly agter tralies

Kommentaar

Republikein 2026-05-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.