Medisynebeheerraad nou in ACC se visier

Die direkteur-generaal van die Teenkorrupsiekommissie van Namibië (ACC), Paulus Noa, het bevestig hy het ’n brief van die minister van gesondheid en maatskaplike dienste, dr. Esperance Luvindao, ontvang waarin ’n ondersoek na die Namibiese Medisynebeheerraad (NMRC) oor die beweerde invoer van onwettige medikasie in die land versoek word. Dit volg op ’n onthulling deur Luvindao gister in die Nasionale Vergadering (NV) waar sy bevestig het dat sy die ACC genader het om die beweerde invoer van ongeregistreerde malariamedikasie ter waarde van N$450 000 te ondersoek.In haar brief aan die ACC het Luvindao die NMRC se verantwoordelikheid vir die regulering van medisyne en verwante middels in die land beklemtoon.“In die besonder is ernstige bewerings van die oortreding van die Wet op die Beheer van Medisyne en Verwante Middels van 2003 geopper,” het die minister geskryf.Die minister het verder kommer uitgespreek oor 'n moontlike medikasiediefstal- en herverkoopsindikaat wat na bewering binne haar ministerie bedryf word. “Bewerings is gemaak oor ’n sogenaamde medikasiesindikaat wat binne die ministerie bedryf word, waar medisyne wat aan die ministerie behoort, óf op pad na geriewe óf vanaf die Sentrale Mediese Store (CMS) gesteel word en dan na bewering terug aan die ministerie verkoop word,” het sy gesê.“Daar word beweer dat die oortreders saam met werknemers binne die ministerie, CMS, die projekbestuurseenheid (PMU) en NMRC werk.”Volgens die brief kom medikasie na bewering die land binne deur ongemagtigde grensposte en die noodverkrygingstelsel word glo misbruik om dieselfde medisyne teen opgeblase pryse “onder die dekmantel van dringendheid” te verkoop.Luvindao het ook verwys na ’n aparte brief wat aan die ministerie van justisie gestuur is waarin regshulp versoek word. Sy het hulp gevra oor twee kwessies: die versnelling van die aanstelling van ’n regskenner by die NMRC en regsleiding oor die verwydering van ’n raadslid weens beweerde botsing van belange.“Ek sal nie sy naam voorlees nie, aangesien hy nie teenwoordig is nie en ek is aangeraai om nie individue in hul afwesigheid by hul naam te noem nie. Ons soek egter dringende regsleiding oor hierdie verwydering,” het sy gesê.Die minister het ook wat sy onakkurate persepsies oor die ministerie se rol genoem het, uit die weg ruim. “Kom ons wees duidelik: ek kan nie net een oggend wakker word en raadslede ontslaan nie. Dit sal ons aan regsgedinge blootstel. Ons volg die behoorlike proses,” het sy beklemtoon.“Ons regspan het die prokureur-generaal geraadpleeg vir riglyne oor hoe sulke verwyderings hanteer moet word.”AMUPANDA KAP TERUGDie kwessie is die eerste keer in die openbaar deur die aktivis en leier van die Affirmative Repositioning (AR), Job Amupanda, geopper wat gister teruggekap het. “Dis ’n feit dat die onwettige invoer van medisyne in ons land plaasvind, nie net gister nie, nie net verlede maand nie, maar vandag. “Minister, dis ook ’n feit dat u bewus is dat medisyne uit die CMS gesteel en terugverkoop is aan dieselfde instelling. U is daarvan bewus. U is ook bewus van die betrokke maatskappy,” het hy gesê.Amupanda het verder NMRC-lede daarvan beskuldig dat hulle medikasie van maatskappye waarin hulle belange het, goedkeur, sonder om botsende belange te verklaar.“Hierdie raadslede woon vergaderings by, maar nie een van hulle het ooit 'n belangebotsing verklaar nie. Tog het medisyne van hul maatskappye ingekom en dieselfde raadslede soek goedkeuring vir die gebruik daarvan. Dis ’n feit,” het hy beweer.– nikanor@nmh-hub.com.na

Medisynebeheerraad nou in ACC se visier

Kommentaar

Republikein 2025-11-03

Meld asseblief aan om kommentaar te lewer

Medisynebeheerraad nou in ACC se visier

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.