Man sny glo sy keel ná hy hom aan polisie oorgee

‘n Man het Vrydagoggend glo selfmoord probeer pleeg terwyl hy deur die polisie ondervra is.

Volgens die jongste polisieverslag het die man omstreeks 10:20 by die Onayena-polisiekantoor opgedaag nadat hy verneem het dat daar na hom gesoek word. Dit was in verband met ‘n saak van aanranding deur dreigemente wat deur sy meisie teen hom aanhangig gemaak is.

Terwyl die ondersoekbeampte hom in die teenwoordigheid van drie ander polisielede ondervra het, het hy gevra om die kantoor te verlaat om ‘n oproep te maak. Sonder om enige iets te sê, het hy glo voor die kantoor ‘n mes uit sy sak gehaal, sy eie keel gesny en bloeiend op die grond geval, sê die polisie in sy weeklikse misdaadverslag.

Hy is na die Onayena-kliniek vir mediese versorging geneem en is later in ‘n kritieke toestand na die Onandjokwe-hospitaal oorgeplaas. Die polisie-ondersoek duur voort.