Man helder oordag in hoofstad gekaap
Herhaaldelik met pistool geslaan
Hy het die Here heeltyd gevra om hom kalmte te gee en 'n teken om te ontsnap.
’n Jong man is ’n week gelede helder oordag in ’n besige straat in Windhoek wreed aangerand en van sy motor en van sy besittings beroof.
Die 26-jarige Windhoeker is Saterdag omstreeks 15:00 tussen die twee verkeersirkels in Robert Mugabe-rylaan in die rigting van Kleine Kuppe deur twee mans in ’n swart voertuig sonder registrasiemerke gekaap. Die mans het balaklawas aangehad.
Volgens die man het die motor skielik voor hom ingedraai en gestop en hy moes hard rem trap om nie in hul motor vas te ry nie. Hy het probeer om agteruit te ry, maar twee mans het hom deur sy oop venster oorrompel en met ’n pistool teen die kop geslaan.
Die een verdagte het agter in die motor geklim en die man is deur die gaping tussen die twee sitplekke agtertoe gepluk en gedwing om plat te lê. Die ander verdagte het intussen aan die bestuurder se kant ingeklim.
“Ek het probeer kyk waarheen ons ry en om bewus te bly van die omgewing, maar is herhaaldelik met die pistool teen my kop, slaap en nek geslaan. Ek dink hulle wou my bewusteloos slaan,” het hy in ’n telefoniese onderhoud vertel.
Die verdagtes het ook heeltyd gedreig om hom dood te maak as hy nie sy bankrekeningnommer aan hulle verskaf nie.
Die jong man is “agter Namib Mills op ’n grondpad in die berge” uit die voertuig gedwing en beveel om al sy klere en ook sy skoene uit te trek. Hy moes ook sy selfoon en bankkaart se kodes verskaf. Die twee verdagtes het sy hande en voete met sy skoenveters vasgemaak en weggery.
“Ek het die hele tyd vir God gevra om my net kalmte te gee. Ek het Hom ook vir ’n teken gevra dat ek kan ontsnap. Dit het begin reën wat gehelp het dat ek die veters kon loskry wat slap geraak het.”
Dit sou hom ’n uur neem om die veters losgewikkel te kry en hy kon om hulp gaan soek.
’n Werker by trokke ’n hele ent verder kon hom uiteindelik help. Hy het sy ouers en die polisie geskakel en inligting oor die voorval en sy motor is ook wyd in die sosiale media versprei. Die motor is later naby die Wanaheda-polisiekantoor gekry.
Volgens die man het die twee verdagtes die bloed van sy beserings en ook oral waar hulle aan die motor binne en buite geraak het, met handontsmettingsmiddel skoongemaak.
Hy het ’n klein Bybel in sy motor en een van die verdagtes het hom gevra of hy ’n Christen is.
“Toe ek ‘ja’ antwoord, het hy gesê hulle sal my nie doodmaak nie. God het my beskerm en het heeltyd sy Hand oor my gehou.”
Hy het inwoners gemaan om bewus te wees van hul omgewing en nie met ’n oop venster te ry nie.
“Hou jou motor se deure gesluit en veral mense wat op hul fone is, moet meer op hul omgewing konsentreer.”
– [email protected]
Die 26-jarige Windhoeker is Saterdag omstreeks 15:00 tussen die twee verkeersirkels in Robert Mugabe-rylaan in die rigting van Kleine Kuppe deur twee mans in ’n swart voertuig sonder registrasiemerke gekaap. Die mans het balaklawas aangehad.
Volgens die man het die motor skielik voor hom ingedraai en gestop en hy moes hard rem trap om nie in hul motor vas te ry nie. Hy het probeer om agteruit te ry, maar twee mans het hom deur sy oop venster oorrompel en met ’n pistool teen die kop geslaan.
Die een verdagte het agter in die motor geklim en die man is deur die gaping tussen die twee sitplekke agtertoe gepluk en gedwing om plat te lê. Die ander verdagte het intussen aan die bestuurder se kant ingeklim.
“Ek het probeer kyk waarheen ons ry en om bewus te bly van die omgewing, maar is herhaaldelik met die pistool teen my kop, slaap en nek geslaan. Ek dink hulle wou my bewusteloos slaan,” het hy in ’n telefoniese onderhoud vertel.
Die verdagtes het ook heeltyd gedreig om hom dood te maak as hy nie sy bankrekeningnommer aan hulle verskaf nie.
Die jong man is “agter Namib Mills op ’n grondpad in die berge” uit die voertuig gedwing en beveel om al sy klere en ook sy skoene uit te trek. Hy moes ook sy selfoon en bankkaart se kodes verskaf. Die twee verdagtes het sy hande en voete met sy skoenveters vasgemaak en weggery.
“Ek het die hele tyd vir God gevra om my net kalmte te gee. Ek het Hom ook vir ’n teken gevra dat ek kan ontsnap. Dit het begin reën wat gehelp het dat ek die veters kon loskry wat slap geraak het.”
Dit sou hom ’n uur neem om die veters losgewikkel te kry en hy kon om hulp gaan soek.
’n Werker by trokke ’n hele ent verder kon hom uiteindelik help. Hy het sy ouers en die polisie geskakel en inligting oor die voorval en sy motor is ook wyd in die sosiale media versprei. Die motor is later naby die Wanaheda-polisiekantoor gekry.
Volgens die man het die twee verdagtes die bloed van sy beserings en ook oral waar hulle aan die motor binne en buite geraak het, met handontsmettingsmiddel skoongemaak.
Hy het ’n klein Bybel in sy motor en een van die verdagtes het hom gevra of hy ’n Christen is.
“Toe ek ‘ja’ antwoord, het hy gesê hulle sal my nie doodmaak nie. God het my beskerm en het heeltyd sy Hand oor my gehou.”
Hy het inwoners gemaan om bewus te wees van hul omgewing en nie met ’n oop venster te ry nie.
“Hou jou motor se deure gesluit en veral mense wat op hul fone is, moet meer op hul omgewing konsentreer.”
– [email protected]
Kommentaar
Republikein
Geen kommentaar is op hierdie artikel gelaat nie