Kommerwekkende toename in voorvalle van geslagsgeweld

Kavango-Wes het ’n kommerwekkende toename in voorvalle van geslagsgebaseerde geweld (GBV) vir die eerste ses maande van vanjaar aangeteken, met die huidige 60 voorvalle wat reeds die 55 gedurende dieselfde tydperk verlede jaar oorskry.Die polisie se bevelvoerder in Kavango-Wes, komm. Julia Sakuwa-Neo, het tydens die amptelike bekendstelling van die #EndGBVNamibia-veldtog in die streek gesê 20 voorvalle met 18 inhegtenisnemings is van Januarie tot Junie aangeteken. Die res van die statistiek sluit in twee pogings tot verkragting met een persoon wat in hegtenis geneem is; twee voorvalle van seksuele dade met ’n minderjarige met twee arrestasies; vyf moordaanklagte wat verband hou met huishoudelike geweld met al die verdagtes wat agter tralies is; ses voorval van poging tot moord met drie arrestasies; 14 voorvalle van aanranding met die doel om ernstig te beseer met 11 arrestasies; sewe voorvalle van aanranding deur dreigemente met vyf arrestasies; drie voorvalle van algemene aanrandings met twee arrestasies; en een voorval van kwaadwillige saakbeskadiging. Sakuwa-Neo sê altesaam 60 voorvalle is aangemeld en 48 mense is in hegtenis geneem. Slegs vyf voorvalle is afgehandel, wat volgens haar verwag kan word gegewe die ingewikkeldheid en uitgerekte aard van GBV-ondersoeke.Teen Junie verlede jaar is 55 voorvalle van GBV in Kavango-Wes aangemeld, met 41 verdagtes wat in hegtenis geneem is. Die vergelyking tussen die dienoorkomstige tydperke wys ’n jaar-tot-jaar-toename van 9%, wat daarop dui dat die voorkoms van GBV in die streek steeds styg. Verkragting bly die mees algemene GBV-oortreding in die streek, met minderjariges wat die meeste geraak word, gevolg deur bejaarde slagoffers. Huishoudelike geweld, veral aanranding deur dreigemente tussen paartjies, is in die tweede plek. Volgens Sakuwa-Neo was al die verdagtes in moordvoorvalle tussen 2024 en 2025 mans en die meeste slagoffers, insluitend ’n baba, vroulik. In een van die ergste voorvalle wat verlede jaar aangemeld is, is ’n eenjarige baba met ’n klip teen die kop geslaan en het later aan ernstige beserings beswyk. ’n Ontleding het gewys op Bunya as die top-misdaadbrandpunt in die streek, gevolg deur Murenguru, Kahenge, Mururani en Ngaute.Dié gebiede ervaar die hoogste voorkoms van geslagsgeweld met die meeste voorvalle wat saans voorkom. Volgens Sakuwa-Neo vind die misdade gewoonlik plaas wanneer kinders alleen by die huis gelos word, terwyl ouers by cuca-winkels gaan drink. Vanuit ’n breër perspektief het die totale aantal GBV-voorvalle vir 2024 op 92 gestaan, met 66 verdagtes wat in hegtenis geneem is. Twaalf verdagtes is nog op vrye voet. Die sukseskoers vir arrestasies en die vordering van sake, staan volgens die polisie op 72%.Sakuwa-Neo het kommer uitgespreek oor die groeiende aantal voorvalle en het ’n beroep op die publiek gedoen om dit as ’n wekroep te beskou. “Teen die einde van die jaar gaan ons verlede jaar se totale aantal voorvalle verbysteek en dit is niks om op trots te wees nie,” het sy gesê.BETROKKENHEID VAN GEMEENGSKAPKavango-Wes se goewerneur, Verna Sinimbo, het tydens dieselfde geleentheid die belangrike rol beklemtoon wat gemeenskapsbetrokkenheid in die beëindiging van GBV speel. Sy het beklemtoon die #EndGBVNamibia-veldtog is nie bloot simbolies nie, maar het ten doel om in te lig en te onderrig en ook eerlike gesprekke in huise en gemeenskappe aan te wakker. “Die veldtog gaan daaroor om skadelike praktyke en oortuigings uit te daag. Dit het ten doel om die manier hoe ons dink, praat en optree met betrekking tot GBV te verander,” het sy gesê.Sy het verwys na bevindinge vervat in ’n nasionale GBV-studie in 2017 wat ongelyke magsverhoudings, werkloosheid, armoede, middelmisbruik en skadelike kulturele praktyke, soos kinderhuwelike, as die sleuteldryfvere van GBV in Namibië uitsonder.“Die beëindiging van GBV is nie net die regering se verantwoordelikheid nie, dis ’n nasionale en kollektiewe plig. Geweld moet nooit aanvaar of in ons huise weggesteek word nie,” het Sinimbo gemaan. Die veldtog word nou na alle kiesafdelings in Kavango-Wes uitgebrei deur gekoördineerde pogings deur die polisie, asook die ministeries van geslagsgelykheid en kinderwelsyn en inligting en kommunikasietegnologie. Inwoners is ook aangemoedig om alle vorme van geweld, hetsy fisiek, emosioneel, sielkundig of ekonomies, aan te meld en om plaaslike inisiatiewe te ondersteun om die streek vry van geslagsgeweld te maak. – republikein@republikein.com.na

Kommerwekkende toename in voorvalle van geslagsgeweld

Kommentaar

Republikein 2026-01-30

Meld asseblief aan om kommentaar te lewer

Kommerwekkende toename in voorvalle van geslagsgeweld

Kommentaar

Republikein 2026-01-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.