Ingrid. Roslin. Beyonce

Gebroke, woedend, bang. Die gemeenskap van Okahandja is in rou gedompel ná nog ’n brutale ontvoering, verkragting en moord op een van sy mees kwesbare inwoners. Die liggaam van die sesjarige Roslin Ndinelao Fabian, ’n leerling van die Gekombineerde Skool K.W. von Marees wat Donderdag as vermis aangemeld is, is Vrydag na ’n koorsagtige en desperate soektog tot in die middernagtelike ure agter die begraafplaas in Veddersdal ontdek. Saterdag word die halfnaakte liggaam van die 15-jarige Beyonce !Kharuxas in die dorp se Vyfrandkamp-nedersetting gevind. Enkele weke vroeër op 21 Maart is die gebreekte liggaam van nog ’n leerling van K.W. von Marees, die vyfjarige Ingrid Maasdorp, in ’n tonnel naby die nuwe brug langs die B1-hoofpad in Veddersdal ontdek. Roslin is oudergewoonte by die skool afgelaai, maar het glo nooit klas toe gegaan nie. Volgens berigte was sy hartseer en het gehuil omdat kinders by die skool gesê het hulle moes nie die betrokke dag gewone klere gedra het nie, maar wel skoolklere. Roslin het omgedraai en besluit om dan eerder huis toe te stap. Volgens drie jong leerlinge het twee mans en ’n vrou met hul gesigte versteek agter swart maskers Roslin gegryp en met ’n mes gedreig. Sy is na bewering met ’n baksteen oor die kop geslaan. In die geval van Ingrid is sy ook oudergewoonte by die skool afgelaai en is sy deur haar nefie na haar klaskamer geneem. Toe die familie haar ná skool wou gaan oplaai, was sy egter weg. Volgens haar ouma, Molly Maasdorp, het hulle eers ná haar verdwyning by die skool uitgevind dat dit gesluit is weens die reën. ’n Medeleerling het beweer Ingrid is deur ’n onbekende vrou opgelaai, inligting wat met die polisie gedeel is, maar wat volgens ouma Molly “verby daardie inligting gekyk het, want die seuntjie (getuie) was klein”.“Wat beteken dit as die seuntjie dit twee keer op dieselfde manier gesê het as wat hy dit eerste gesê het?” het die ouma gevra.Die gemeenskap, verenig in die desperate hoop dat Roslin dieselfde lot as die vyfjarige Ingrid gespaar sou bly, het dadelik na haar begin soek. Van ouers tot bure, die polisie en vreemdelinge het Vrydag tot 02:00 die dorp gefynkam, met alle hoop wat verwoes is toe ook haar liggaam later die dag in Veddersdal gevind is. Die hartseer is vinnig met woede en frustrasie vervang, met veral die skool waar beide Ingrid en Roslin leerlinge was wat onder kritiek van die gemeenskap en veral ouers deurgeloop het. “Watter hoof is dit wat ’n skool laat aangaan wanneer ’n kind vermis word?” het een ma deur haar trane gevra.“Waar is die simpatie? Waar is die eenheid?” Verskeie ouers het uit vrees vir hul kinders se lewens besluit om hulle eerder tuis te hou totdat daadwerklike stappe gedoen is om hulle te beskerm. Die naweek is bewerings deur die woedende en verslae gemeenskap gemaak dat twee mans en ’n vrou vroeër ook probeer het om ’n jong meisie naby ’n bekende kettingwinkel op die dorp te ontvoer, maar het in hul poging misluk.BELONING UITGELOOFDie Okahandja Mediese Praktyk het ’n beloning van N$5 000 uitgeloof vir enige inligting wat tot die inhegtenisname van die moordenaar(s) van die dorp se drie jong slagoffers kan lei. Ook die plaaslike sakeman Thomas Shako Mutilifa het N$20 000 tot die beloning vir inligting bygedra. “As ’n ouer van twee dogtertjies is ek vreesbevange. Hierdie barbaarse optrede moet stop,” het hy gesê.Tydens ’n besoek aan Roslin se gebroke familie, is die adjunkminister van onderwys, innovering, jeug, sport, kuns en kultuur, Dino Ballotti, deur emosie oorval. Met sy stem wat breek het hy beloof die regering sal die tragiese dood van hul jong dogter as ’n kwessie van dringendheid takel en sal verseker dat strenger maatreëls by die skool ingestel word om leerlinge te beskerm.NASIONALE KRISISDie minister van binnelandse sake, immigrasie, veiligheid en sekuriteit, Lucia Iipumbu, het die moorde as ’n nasionale krisis verklaar en in ’n sterk bewoorde verklaring die hoof van die Namibiese polisie, inspekteur-generaal Joseph Shikongo, opdrag gegee om onmiddellik die beste ondersoekspanne op Okahandja te ontplooi om die moordernaar(s) vas te trek. “Hierdie moorde moet as ’n nasionale krisis erken word en kan nie genormaliseer word nie,” het Iipumbu gesê. Sy het ’n beroep op elke skool, elke kerk en elke gemeenskap in die land gedoen om dadelik beleidsrigtings vir die beskerming van hul kinders te ontwikkel. Sy het by ouers gepleit om te sorg dat hul kinders altyd in groepe loop en nooit alleen gelaat word nie. “As ’n gemeenskap moet ons waaksaam bly. Wanneer ’n kind vir jou iets kommerwekkend vertel, doen dadelik iets om hulle te beskerm,” het sy gemaan. PATROLLIESAs deel van die polisie se volskaalse operasie sal lede van die polisie en korrektiewe dienste in die dorp ontplooi word vir patrollies wat veral sal fokus op die ontbossing van onder meer rivierbeddings wat ’n veiligheidsrisiko kan inhou. Gesprekke met die weermag is ook aan die gang om die teenwoordigheid van lede in uniform op Okahandja te versterk. Die Metaal en Verwante Werkersunie en die Namibiese Nasionale Onderwysersunie het intussen daarop aangedring dat die skole waar die veiligheid van onderwysers en leerlinge in gedrang is, dadelik moet sluit. Die minister van onderwys, innovering, jeug, sport, kuns en kultuur, Sanet Steenkamp, het Sondag ná ’n vergadering met Okahandje se burgemeester, Beatrice Kotungondo, en ander rolspelers gesê sy sal vandag met onderwysers in lewensvaardighede en veral dié wat in berading opgelei is van omliggende skole vergader om hulle na die Gekombineerde Skool K.W. von Marees te ontplooi. Sy het ook ’n versoek aan die streekdirekteur van onderwys in Otjozondjupa, Gerhard Ndafenongo, en sy span gerig om die situasie by die skool te evalueer en nou saam met onderwysers en skoolhoofde op die dorp te werk om ook hul menings oor die tragiese voorvalle in te win en enige kwessies te takel.PRESIDENTPresident Netumbo Nandi-Ndaitwah het gister vergesel van ’n komitee wat bestaan uit die minister van geslagsgelykheid en kinderwelsyn, dr. Emma Kantema (voorsitter), die minister van onderwys, innovering, jeug, sport, kuns en kultuur, Sanet Steenkamp; die minister van binnelandse sake, immigrasie, veiligheid en sekuriteitLucia Iipumbu; die minister van justisie en arbeidsverhoudinge, Fillemon Wise Immanuel, asook die minister van gesondheid en maatskaplike dienste, dr. Esperance Luvindao, Okahandja besoek om die situasie op die dorp te evalueer en ingrypings te bespreek. – republikein@republikein.com.na

Ingrid. Roslin. Beyonce

Kommentaar

Republikein 2025-04-30

Meld asseblief aan om kommentaar te lewer

Ingrid. Roslin. Beyonce

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie