Glo geen toilet vir vroueverdagte

’n Vrou in aanhouding by die Katutura-polisiestasie moes glo in die openbaar langs die pad haar nood verlig. Die voorval spruit uit Marelle Gawaseb (35) wat Sondag in hegtenis geneem en na die Katutura-poliesiestasie geneem is. Sy is later aangekla van aanranding deur dreigemente en naamskending. Volgens die klagstaat het sy glo haar buurvrou gedreig en haar daarvan beskuldig dat sy “haarself verkoop”.Gawaseb se prokureur, Garth Joseph vanaf Neves Legal Practitioners, het omstreeks 19:00 by die polisiestasie aangekom. “Toe ek navraag oor vroue-aangehoudenes doen, spesifiek toegang tot behoorlike geriewe of die oorplasing na Klein Windhoek, is ek met ’n traak-my-nie-agtige houding begroet: ‘Nee, die beskuldigde sal daar tot môre sit, wanneer hulle haar sal kom ondervra’,” vertel Joseph.In ’n openbare brief het die prokureur geskryf toe Gawaseb later daardie aand moes urineer, het twee vrouepolisiebeamptes haar uit die gebou vergesel.Nie na ’n toilet nie, “maar na ’n stukkie oop gras langs die pad”. Joseph skryf dat sy kliënt gedwing is om daar in volle sig van die publiek te urineer.“Geen toiletpapier of sanitêre geriewe is vir haar beskikbaar gestel nie. Die vernedering van die situasie spreek vanself: ’n Vrou, in die donkerte gelaat, blootgestel aan die elemente en verbygangers.”Gawaseb is Maandag vrygelaat nadat sy skuldig gepleit het. Sy moet ’n boete van N$500 voor 12 Maart betaal.Toe sy oor die voorval genader is, het die Namibiese polisie se eerste vrouebevelvoerder in die Khomasstreek, kommissaris Johanna Ngondo, aan Network Media Hub (NMH) gesê “dit is nuus vir my”. Volgens Ngondo behoort geen aangehoudene reeds van die begin van vanjaar af by die Katutura-polisiestasie gehuisves te word nie.“Ons hou nie gevangenes by die Katutura-polisiestasie aan nie, net by Wanaheda, en vroue altyd by Klein Windhoek,” het sy gesê.Ngondo sê sy het die inligting oor die voorval met die interne direktoraat vir polisiegedrag en -ondersoeke gedeel en wou intussen nie kommentaar lewer oor die beweerde voorval nie.– augetto@nmh-hub.com.na

Glo geen toilet vir vroueverdagte

Kommentaar

Republikein 2026-04-23

Meld asseblief aan om kommentaar te lewer

Glo geen toilet vir vroueverdagte

Kommentaar

Republikein 2026-04-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.