Familie rou oor Romeo

Die hartseer het swaar in die lug gehang toe die familie van wyle Romeo Pienaar (4) op die Dinsdagmiddag ná die Paasnaweek buite hul beskeie huis in die Otjomuise-woonbuurt in die hoofstad byeengekom het. 

In swart geklee het hulle styf teen mekaar gesit terwyl hulle besoek van Network Media Hub (NMH) ontvang het. Daar was geen vuur wat in die erf gebrand het nie – net stilte, hartseer en die swaar gewig van ’n ondenkbare verlies. 

In die middel het die 45-jarige Maria Pienaar, Romeo se ouma, gesit – haar beseerde gesig ’n duidelike herinnering aan die trauma wat sy deurgemaak het. Haar linkeroog was blou gekneus en haar voorkop geswel. 

Deur die pyn en uitputting het sy die gebeure van die tragiese Saterdagmiddag vertel wat hul lewens vir altyd sou verander. 

Volgens Maria het haar kêrel, die 34-jarige Erick Moses !Kharugub, haar omstreeks 15:00 gevra het om saam met hom na Truck Port te gaan om klere en skoene te verkoop. Al was sy huiwerig en het sy gevra waarom hulle so ver moes ry, het sy ingestem om te gaan. Sy het opgemerk dat hy toe geen sigbare tekens van woede of ontsteltenis getoon het nie. 

Hul rit het ’n wending geneem toe hulle by ’n drankwinkel, bekend as Drip-Drip, stilgehou het. !Kharugub het bier gekoop, daarvan gedrink en dit vir haar aangegee. 

“Selfs toe het hy nie gelyk soos iemand wat kwaad is of wat ons sou seermaak nie,” het sy onthou. 

Wat egter gevolg het, was ’n skielike en vreesaanjaende ommekeer. 

“Soos ons verder weg van mense geloop het, het sy gees net verander,” het Maria gesê en kort-kort asem geskep om tot verhaal te kom. 

“Toe ons by ’n gedeelte met die plaveistene kom, het hy skielik die kind op die grond gegooi.” 

Haar stem het gebewe toe sy die verskrikking beskryf wat ontvou het. Sy het gesê die gebied was verlate. 

“Daar was niemand om my te hoor nie. Dit was te stil,” het Maria gesê. 

!Kharugub het glo ’n mes uitgehaal en haar met dreigemente tot stilte gedwing. Wat gevolg het, was ’n wrede en onophoudelike aanval. 

Maria het beskryf hoe hy die kind herhaaldelik uit haar arms geruk en op harde oppervlaktes gegooi is – op die pad, op klippe – terwyl sy desperaat elke keer probeer het om die kind te vang. 

“Elke keer as hy die kind gegooi het, het ek probeer om hom te vang,” het sy deur die trane gesê, “maar hy het aangehou. 

“Daar was geen manier dat die kind buite kon bloei nie; hy het reeds binne-in sy liggaam gebloei.” 

Volgens Maria is is self in die proses aangerand en het twee keer geval terwyl sy haar kleinseun probeer beskerm het. 

Op ’n stadium, het sy gesê, het !Kharugub die kind oor sy skouer “soos ’n 10 kg-sak geslinger”. 

Die ouma het onthul dat dit nie haar kêrel van ses maande se eerste teken van geweld was nie. Net ’n week tevore is Romeo glo twee keer deur !Kharugub geklap, met sigbare handmerke wat agtergebly het. Vrees en beheer, het sy verduidelik, het haar stil gehou. “Ek is nie eens toegelaat om ’n foon te hê of tussen mense te wees nie,” het sy gesê. 

Familielede het bevestig dat bekommernisse oor !Kharugub reeds voorheen geopper is en hom as ’n gevaar vir die mense rondom hom beskryf. 

Romeo het skaars vir ’n maand by sy ouma gewoon, voor die noodlot toegeslaan het. 

Hy was die eersgeborene van sy ma wat nou 19 jaar oud is. Sy pa, wat onlangs werk naby Brakwater gekry het, is volgens die familie stomgeslaan deur die verpletterende nuus. 

Maria het beskryf hoe sy aanhoudend vir krag gebid het terwyl die geweld ontvou het. 

“Ek het geraas gemaak, ek het geskree, ek het gebid selfs toe ek geen energie oor gehad het nie,” het sy gesê. 

“Hy was dronk en gewelddadig. Ek kon hom nie oorweldig nie.” 

Ná die aanval het die kind glo roerloos op die grond gelê. Maria het na ’n sekuriteitswag daar naby gehardloop en om hulp gesmeek. 

“Hoekom het jy hom laat gaan? Hy het die seuntjie doodgemaak! Hoekom het jy hom nie gestop nie?” het sy glo uitgeroep. Die sekuriteitswag, het sy gesê, het nie geantwoord nie, maar vir haar gesê sy moet hardloop. 

Wat gevolg het, was nog ’n pynlike beproewing vir Maria – sy het glo drie uur vir nooddienste gewag. 

“Toe hulle uiteindelik kom, het hulle gesê hy is dood,” het sy sag gesê, “maar voor dit was hy nog lewendig.” 

Weens die erns van sy beserings is die familie nie toegelaat om Romeo se liggaam te sien nie. 

!Kharugub se suster het na bewering na die familie uitgereik en haar skok en ongeloof oor haar broer se beweerde dade uitgespreek. 

Terwyl hulle rou, staar die familie nou nog ’n harde werklikheid in die gesig – finansiële nood. Hulle het onthul dat hulle nie eens N$100 gehad het om Romeo se doodsertifikaat te kry nie. 

“Ons sukkel,” het sy gesê. “Ons vra enige barmhartige Samaritaan om ons asseblief met die begrafnis te help. Geen bedrag is te klein nie.” 

Die familie het ’n beroep op lede van die publiek gedoen vir ondersteuning in hierdie pynlike tyd. 

Vir verdere navrae, kontak Magriet by 081 777 2032.

Intussen het die moordbeskuldigde Dinsdag in die Windhoekse landdroshof verskyn en bly in aanhouding.

Terug in die stil erf in Otjomuise word die afwesigheid van die lag van ’n jong seuntjie diep gevoel. Die familie sit saam, verenig in rou, op soek na krag terwyl hulle probeer om vrede te maak met ’n tragedie wat woorde skaars kan beskryf. 

– [email protected]