Egpaar oorval, beroof by afgeleë kampterrein

’n Egpaar van die Wes-Kaap wat Namibië die afgelope 30 jaar besoek en gesoute kampeerders is, is die naweek deur ses mans – gewapen met messe en pangas – by ’n oord in die suide van die land beroof.Deona en Eddie Reyneke het kamp opgeslaan by Namibia Wildlife Resorts (NWR) se Boplaas-kampterrein langs die Oranjerivier en sowat 60 km van Rosh Pinah toe hulle oorval is. Volgens die Reynekes het hulle omstreeks 19:00 by die kamp aangekom wat heeltemal verlate was met net ’n “flou lig” wat gebrand het. Die egpaar het kamp opgeslaan en ’n braaivleisvuur aangesteek. ’n Voertuig het stadig verby hulle gery waar hulle by die vuur gesit het.“Dit het geklink of dit gestop het. Ek het skielik ongemaklik gevoel en die pepersproei gaan haal,” vertel Eddie. Ses mans het skielik hul verskyning van agter ’n ablusieblok gemaak, met drie wat Deona en drie wat Eddie gegryp het. Deona se baadjie is van haar afgeruk en deur die rower aangetrek, terwyl al haar juwele – – van haar oorbelle tot haar trouring – van haar gestroop is. Haar hande is agter haar rug vasgebind. Eddie se bril is van sy gesig geklap en sy trouring afgehaal, terwyl sy hande ook agter sy rug vasgebind is. Die heeltyd het die rowers gedreig “be quiet, I will kill you!”“Alles is ook uitgegooi (uit die karavaan) en oopgeruk op soek na geld,” vertel Eddie.Volgens hom het die rowers buiten hul bankkaarte se PIN-kode ook geëis dat hy geld moet oorplaas.“Ek het verduidelik ons is van Suid-Afrika en daar is nie ’n sein om ’n oorplasing te doen nie.”Die egpaar is in die karavaan geboender en op die bed laat sit waar hul voete ook vasgebind is. Die twee is agteroor op die bed gegooi en met ’n duvet toegegooi. Die rowers se opdrag was “you must be quiet and sleep. I will come back and kill you!”Hulle het die karavaan gesluit en met die egpaar se bakkie en ook toerusting, soos selfone en kameras, asook juwele met ’n gesamentlike waarde van sowat N$300 000 gevlug.Eddie kon daarin slaag om uit die karavaan te kom, ’n mes in die hande te kry en homself en Deona te bevry. Hulle het in die pad in Aussenkehr se rigting beweeg, maar uit vrees dat die rowers sou terugkeer elke 100 meter in die veld weggekruip.“Ons het nie geweet hoe ver ons moes stap vir hulp nie en was bang en het besluit om eerder op die berg agter rotse te skuil vir die nag.”Met sonopkoms het hulle sowat 15 km tot 20 km gestap voordat iemand hulle opgelaai het. Hulle bakkie is verlate verder langs die pad gevind, terwyl hulle sleutels en ook hul paspoorte in die veld daar naby gevind is.Buiten vir die feit dat hulle geweldig getraumatiseer is, het die egpaar net “blou merke”, terwyl Eddie ’n sny op sy vingers het. “Hulle [rowers] was geweldig sterk en aggressief. Hulle wou nie hê dat ek bid nie en het woedend daaroor geraak. Maar ek het vir hom gesê ‘my God is a good God’. Die hele pad wat ons gestap het, het ons gebid. Ons is nie stukkend of gemartel of dood nie, ons het steeds mekaar.”Die egpaar was vol lof vir die polisie se “baie goeie samewerking en uitstekende diens” en ook vir die “engele van Oranjemund”.“Ons wil net almal in Oranjemund bedank vir hul hulp en gasvryheid, veral die familie by wie ons tuisgaan, hierdie mense is baie kosbaar!”Hulle het vir die res van hul Namibiese reis vir eers kamp opsy geskuif en gaan vir twee weke op ’n plaas in die Noorde uitspan.Intussen het NWR se woordvoerder, Nelson Ashipala, gesê die oord se sekuriteit is reeds by die kamp om ’n evaluering van die veiligheidsituasie van die afgeleë kamp te doen om dit op te skerp. Die hoop is ook om personeel by die terrein aan te vul. Volgens Ashipala het die swaar reën in die Noord-Kaap en die sluiting van die grens by Vioolsdrift vir ’n skielike toename in besoekers in die omgewing gesorg. “Dit is ’n ongelukkige situasie. Kampeerders is maklike teikens want daar is nie altyd omheinings nie. NWR verseker egter alle besoekers veiligheid word opgeskerp, ouens is op die grond om inspeksies te doen,” het hy gesê. – henriette@republikein.com.na

Egpaar oorval, beroof by afgeleë kampterrein

Kommentaar

Republikein 2026-06-19

Meld asseblief aan om kommentaar te lewer

Egpaar oorval, beroof by afgeleë kampterrein

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.