Diamantrooftog: Het Endjala vir Eiseb geskiet?

Hoofredaksie – Die ondersoek ná Saterdag se gewapende rooftog by Namdia, die regering se diamantbemarkings- en verkoopsmaatskappy, het uitgebrei om te bepaal of Max Endjala wat glo sy eie lewe op die toneel geneem het, moontlik die maatskappy se veiligheidshoof, Francis Eiseb, kon geskiet het.Volgens die polisie is Eiseb dood in ’n stoorkamer gevind met sy hande en voete vasgebind, ’n inkopiesak oor sy kop getrek met ’n skietwond aan sy kop. Endjala het na bewering selfdood gepleeg toe die polisie op hom en ander verdagtes wat by die rooftog betrokke was begin toeslaan het. Trustco Group Holdings, Endjala se werkgewer, het egter gister vir ’n kinkel in die kabel gesorg deur in ’n mediaverklaring te verklaar dat hy “tragies dood is” tydens die rooftog.’n Bron het gister beweer die polisie ondersoek nou of Eiseb geskiet is met dieselfde wapen wat Endjala gebruik het om homself dood te skiet.“Dis ’n baie maklike feit om deur forensiese toetse vas te stel.”Die breër ondersoek na die rooftog word gesamentlik deur die Namibiese polisie se ondersoekeenheid vir ernstige misdaad, sowel as die afdeling vir beskermde hulpbronne gelei. Hulle word ondersteun deur die direktoraat vir kriminele ondersoeke (CID) en die polisie se intelligensie-afdeling.Teen gister moes die ondersoekers nog die kringtelevisie-beeldmateriaal van Saterdag se dodelike drama nagaan, terwyl ’n lasbrief vir die mobiele kommunikasienetwerkoperateur MTC voorberei is om data te verskaf wat verband hou met die kommunikasie tussen die verdagtes en ander medepligtiges. ‘SELFGEMOTIVEERD’Endjala se neef Joel Angula, ’n veiligheidswag by Namdia wat tydens die rooftog aan diens was, is Sondag ná lang ondervragings in hegtenis geneem. Angula is ’n voormalige polisiebeampte. Hy sou gister formeel aangekla word saam met Sam Shololo, een van die vier verdagtes wat Saterdag na bewering die gebou bestorm het. Uit die vier is net Shololo in hegtenis geneem, met twee ander verdagtes wat op die vlug geslaan het, terwyl Endjala sy eie lewe geneem het. Shololo is ’n voormalige lid van die Namibiese weermag wat homself op LinkedIn beskryf as ’n “ervare opleidingsbeampte met ’n geskiedenis van werksaamhede in die sekuriteits- en ondersoekbedryf”.Hy beskryf homself ook op sosialemediaplatforms wat op besighede en werksgeleenthede fokus as ’n “positiewe, onafhanklike en selfgemotiveerde persoon met die vermoë om nuwe prosedures en vaardighede vinnig en doeltreffend te leer”.Shololo is tydens sy arrestasie beseer en is tans onder polisiebewaking in die Katutura-staatshospitaal waar hy behandeling ontvang. MISDAADTONEELNetwork Media Hub (NMH) het gister berig dat die verdagtes na bewering ’n groot besending diamante geteiken het wat glo N$700 miljoen werd is. Die maatskappy was geskeduleer om dit Maandag aan kliënte te verkoop. Die twee verdagtes wat weggekom het, het volgens Namdia met ’n onbekende aantal diamante ontsnap.Volgens ’n bron na aan die ondersoek is die rooftog haarfyn beplan, met die verdagtes wat bewus was van die hoë waarde van die besending. “Namdia het voorberei vir 'n beduidende verkoopstransaksie wat vir Maandag geskeduleer was. “Die rede waarom so baie van die personeel Saterdag laat gewerk het, was om die voorbereidings vir die groot transaksie Maandag te finaliseer,” het die bron gesê. Die transaksie is intussen gekanselleer. 'n Beampte het gister gesê die oorblywende diamante sal as bewysstukke in die strafregtelike ondersoek gebruik word, dus sal dit nie binnekort verkoop kan word nie.“Die hele Namdia-gebou word nou as ’n misdaadtoneel vir die doeleindes van die ondersoek hanteer.”Die polisie en Namdia sal ’n gesamentlike mediakonferensie hou op ’n datum en plek wat nog bevestig sal word, het die polisie gister gesê. – republikein@republikein.com.na

Diamantrooftog: Het Endjala vir Eiseb geskiet?

Kommentaar

Republikein 2026-02-03

Meld asseblief aan om kommentaar te lewer

Diamantrooftog: Het Endjala vir Eiseb geskiet?

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.